Ottura asiya döletliri térrorgha qarshi küreshtin paydilinip öktichilerni basturmasliqi kérek

Amérika tashqi ishlar minstirliqi térrorchiliqqa qarshi turush idarisining bashliqi dél déli ottura asiya döletlirini térrorchiliqqa qarshi urushtin siyasiy öktichilerni basturush üchün paydilanmasliq toghrisida agahlandurdi.

Déli 8‏ - noyabir küni biryosilda azatliq radi'osigha bergen bayanatida, "eger ottura asiya döletliri térrorchiliqqa qarshi urushtin öz xelqini basturush üchün paydiliniwatqan bolsa, bu nahayitimu xata bir heriket. Ottura asiya döletliride, térrorchiliq heqqide heqliq endishiler mewjut. Lékin buning ottura asiya döletliridiki musulman ahalisi bilen héchqandaq munasiwiti bolmasliqi mumkin. Shuning üchün biz ottura asiya döletliridin özlirining musulman ahalisini térrorchiliqning menbesi dep qarimasliqini telep qilimiz"dédi.

Déli, ottura asiya döletlirini ochuq-ashkara tenqid qilmighan bolsimu, " 2005 yili may éyida özbékistanning enjan shehiride namayishchilarning özbékistan bixeterlik qisimliri teripidin oqqa tutulghanliqi, amérikining ottura asiyagha qaratqan siyasitide bir burulushqa seweb boldi, washn'gton kishilik hoquqning depsende qilin'ghanliqigha köz yummidi" dep körsetti.

Déli, amérikining térrorchiliqqa qarshi urushta ittipaqdashliri bolghan ottura asiya döletlirini ochuq-ashkara tenqid qilmighan bolsimu, lékin diplomatik yollar arqiliq, mezkur döletlerdiki kishilik hoquq depsendichiliklirige özining naraziliqini ipadiligenlikini, bildürdi. (Eqide)