Өзбекистан һөкүмити хитай-түркмәнистан газ туруба линийисини қоллайду


2007-07-29
Share

26-Июл күни өзбекистан ташқи ишлар министири владимир норов түркмәнистан пайтәхти ашхабадни зиярәт қилғанда, президент қурбангүл бәрди муһәммәдоф билән көрүшүп өзбекистан рәһбири ислам кәримофниң хитай- түркмәнистан газ туруба линийисиниң өзбекистанни кесип өтүшини қоллайдиғанлиқини билдүргән.

Буниңдин икки һәптә илгири түркмәнистан президенти бәрдимуһәммәдоф бейҗиңни зиярәт қилғанда хитай рәһбири ху җинтав билән икки дөләт арисида газ туруба линийиси қуруш һәмдә хитайни һәр йили 30 милярд куб метир газ билән тәминләшкә қошулған иди. Бу келишим әслидә сәпәр мурат ниязоп дәвридә имзаланған болуп, йеңи түркмән рәһбири бу қетим бу келишимләрни күчкә игә қилған.

Хитай билән түркмәнистан арисидики газ турубисиниң өзбекистан, қазақистанлар арқилиқ вә яки қирғизистан арқилиқ уйғур елиға , униңдин кейин хитайниң ичкири өлкилиригә туташтурулушиниң мумкинлики һәққидә пәрәзләр давамлашмақта. Униңдин башқа өзбекистан билән хитайму 530 километирлиқ газ турубиси ятқузуш һәққидә келишим һасил қилған болуп, бу қурулушни әмәлгә ашурушта мәйли түркмәнистан вә яки өзбекистан болсун, буларниң һәр иккилиси қирғизистан , таҗикистан вә яки қазақистандин ибарәт бир дөләттин өтмәй амал йоқ икән.

Өзбекистан ташқи ишлар министири билән түркмән рәһбири президент ислам кәримофниң ашхабад зияритиниң күн тәртипини музакирә қилған.

Нөвәттә, икки дөләтниң илгирики соғуқлишип қалған мунасивәтлириниң иллашқа қарап йүзләнгәнлики мәлум болмақта.(Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт