Явропада бихәтәрлик вә һәмкарлиқ тәшкилати русийни өзбек мусапирлирини өзбекистанға қайтурмаслиққа чақирди

явропа бихәтәрлик вә һәмкарлиқ тәшкилати, җүмә күни русийә һөкүмитидин, өзбекистан һөкүмити тәрипидин әнҗан вәқәсигә қатнашқан дәп әйибләнгән 13 нәпәр өзбек пуқрасини өзбекистанға қайтурмаслиқини тәләп қилди.

Икки күн бурун қирғизистан, 2005‏- йили әнҗан шәһиридә йүз бәргән қанлиқ бастуруш һәрикитидин кейин өзбекистандин қечип қирғизистанда панаһланған 5 нәпәр өзбек пуқрасини бирләшкән дөләтләр тәшкилати мусапирлар комитети вә хәлқара тәшкилатларниң наразилиқлириға қаримай өзбекистанға қайтурған иди.

Өткән һәптә русийә баш тәптиш идариси баянат елан қилип, русийә, өзбекистан һөкүмитиниң русийидә тутуп турулуватқан 13 нәпәр өзбек пуқрасини өзбекистанға қайтуруш тоғрисидики тәлипини қобул қилди дәп көрсәткән.

явропа бихәтәрлик вә һәмкарлиқ тәшкилатиниң рәиси вә белгийә ташқи ишлар министири кәрил дугохт җүмә күни бир баянат елан қилип, русийә һөкүмитидин өзбек пуқралирини өзбекистанға қайтуруш ишни тохтитишини тәләп қилди. У баянатида, мән русийә һөкүмитини бу мәсилини бирләшкән дөләтләр тәшкилати мусапирлар комитети билән һәмкарлашқан һалда, хәлқара қанунларға мувапиқ бир тәрәп қилишқа чақиримән" деди.

Көпчиликкә мәлум болғандәк, 2005‏- йили май ейида өзбекистанниң әнҗан шәһиридә йүз бәргән бастуруш һәрикитидин кейин, йүзлигән киши өзбекистандин қечип кәткән. Вәқә шаһитлири вә хәлқара кишилик һоқуқ тәшкилатлириниң билдүрүшичә, әнҗанҗан шәһиридә кәримоф һөкүмитигә қарши елип берилған наразилиқ намайиши җәрянида йүзлигән киши өзбек қораллиқ қисимлири тәрипидин өлтүрүлгән. Әмма өзбекистан һөкүмити, мәзкур вәқәдә дөләт һакимийитини ағдурушқа урунған көпинчиси террорчи дәп қаралған, 187 кишиниң бихәтәрлик қисимлири тәрипидин өлтүрүлгәнликини билдүрмәктә. (Қанат)