Özbékistan, yawropa ittipaqining enjan weqesini tekshürüsh telipini ret qildi

Özbékistan, amérika, yawropa ittipaqi we sh a o e t qatarliq dölet we teshkilatlarning enjan weqesi üstidin xelq'araliq tekshürüsh élip bérish toghrisidiki bésimigha tirejimekte.

Özbékistan hökümiti jüme küni yawropa ittipaqining enjan weqesini tekshürüsh toghrisidiki telipige pisent qilmidi, emma enjandiki namayishni uyushturghuchilarning adil we ochuq - ashkare sotlinidighanliqini bildürdi.

Yawropa parlaménti peyshenbe küni özbékistan da'irilirini namayishchilargha " heddidin tashqiri qopal mu'amile qilish we xalighanche küch ishlitish" bilen eyiblep, yawropa komitétini kérimof hökümiti xelq'araliq tekshürüshke yol qoyghan'gha qeder, özbékistan'gha yardem bérishni toxtitishni telep qilghan.

Emma özbékistan tashqi ishlar ministirliqi, yawropa ittipaqining tenqidi axbarat agéntliqliri we kishilik hoquq organlirining doklatigha tayan'ghan asassiz eyiblesh, dep ret qildi.

Özbékistan da'iriliri yéqinda shangxey hemkarliq teshkilatidiki rusiye, xitay, qazaqistan, qirghizistan, tajikistan qatarliq döletlerning enjanda tekshürüsh élip baridighanliqini élan qilip, amérika bilen en'giliyining mezkur tekshürüsh ömikige qatnishishini qarshi alimiz, dégen idi. Emma amérika tashqi ishlar ministirliqi mezkur ömekke qatnishishni ret qildi. Tashqi ishlar ministirliqining bayanatchisi, "biz buning terepsiz xelq'araliq tekshürüsh ömiki ikenlikini körüp yitelmiduq," dep tekitligen. Emma rusiye bilen xitay xelq'araliq tekshürüsh élip bérishke qarshi chiqqan. (Erkin)