Tashkent yene qolgha élishni bashlidi

Ottura asiya uchur merkizi "perghane" ning xewer qilishiche, 22-öktebir küni özbékistan saqchi da'iriliri " quyashliq özbékistan" milliy birliki dep atalghan bir démokratik öktichi teshkilat ezalirini tutqun qilghan. Mezkur teshkilatning ish béjirgüchisi qatarliq besh neper xadimi özbékistan teptish mehkimisi teripidin qamap qoyulghan bolup, taki hazirghiche ularning iz dériki heqqide uchur bérilmigen.

Özbékistan öktichilirining tutqun qilinish weqesi rusiye tashqi ishlar ministiri sérgey lawropning tashkentke kélishigha toghra kelgen.

Rusiye tashqi ishlar ministiri bu bir qanche kündin buyan özbékistan we türkmenistanlarda ziyarette bolup, bu döletler bilen bolghan munasiwetlerni téximu ilgirilitish heqqide kélishimlerni tüzgen.

Rusiye islam kérimop hökümitining öktichilerni basturushta hemde amérikining enjan weqesini xelq'araliq tekshürüsh telipini ret qilishida qollash pozitsiyiside bolup kelgen. Amérikidiki özbékistan démokratik qurultiyining re'isi jahan'gir muhemmedning bildürüshiche, islam kérimop, yéqindin buyan öktichilerge zerbe bérishni kücheytken bolup, u amérikining démokratik islahat telipige qarshi turush üchün rusiye we xitay bilen bolghan munasiwetlirini qoyuqlashturmaqta hemde ularning shertlirige könmekte.

Xewerlerge qarighanda rusiye tashqi ishlar ministirining tashkent sepiride jeryanida özbékistan özi buningdin 6 yil ilgiri chiqip ketken rusiyining kontrolluqi astidiki kolléktip bixeterlik kélishimi teshkilatigha qayta kirishke bolghan qiziqishini ipade qilghan iken. (Ümidwar)