ئامېرىكا، ئۆزبېكىستان دائىرىلىرىنىڭ ئۆكتىچى پارتىيە رەھبىرىنى قولغا ئالغانلىقىغا كۆڭۈل ‎بۆلمەكتە


2005.11.02
Share on WhatsApp
Share on WhatsApp

‎ ئامېرىكىدىكى ئىككى پارلامېنت ئەزاسى سەيشەنبە كۈنى دۆلەت پارلامېنتىغا قارار لايىھىسى ‎سۇنۇپ، ئامېرىكا ھۆكۈمىتىنىڭ ئۆزبېكىستان دائىرىلىرىدىن قولغا ئېلىنغان ئۆكتىچى پارتىيە ‎رەھبىرى سەنجەر ئۆمەروف ئادىل مۇئامىلە قىلىنىشى ۋە كىشىلىك ھوقۇقىنىڭ قوغدىلىشىنى تەلەپ ‎قىلىشىنى سورىدى. ‎

‎ نيويورك ۋاقتى گېزىتىنىڭ خەۋىرىگە قارىغاندا، ئامېرىكا كېڭەش پالاتاسىنىڭ كۆپ ‎سانلىقلار رەھبىرى بىل فىرست بىلەن تاشقى مۇناسىۋەتلەر كومىتېتىنىڭ رەئىسى رىچارد لۇگېر بۇ ‎قارار لايىھىسىنى تۈزۈپ چىققان. بۇ ئامېرىكىنىڭ سەنجەر ئۆمەروفنىڭ ۋەزىيىتىگە ئىنتايىن ‎كۆڭۈل بۆلىۋاتقانلىقىنىڭ بىر بىشارىتى ھىسابلىنىدىكەن. ‎

‎ ئۆزبېكىستان كۈن نۇرى بىرلەشمىسىنىڭ رەئىسى ۋە پاختا تىجارەتچىسى سەنجەر ئۆمەروف 10 - ئاينىڭ ‎‎22 - كۈنى ئۆزبېكىستان دائىرىلىرى تەرىپىدىن " پارىخورلۇق ۋە باجدىن قېچىش" جىنايىتى بىلەن ‎ئەيىبلىنىپ، قولغا ئېلىنغان. خەلقئارا جەمئىيەت ئۇنىڭ سىياسىي سۈيقەستكە ئۇچرىغان بولۇشى ‎مۇمكىنلىكى ھەمدە ئۇنىڭ تۈرمىدە خورلىنىشىدىن ئەنسىرىمەكتە. ‎

‎ بۇ ئارىدا، خەلقئارا كىشىلىك ھوقۇقنى كۈزىتىش تەشكىلاتى بايانات ئېلان قىلىپ، سەنجەر ‎ئۆمەروفنىڭ سالامەتلىكىنىڭ ئىنتايىن ناچارلىقىنى، دەرھال داۋالىنىشقا مۇھتاج ئىكەنلىكىنى ‎بىلدۈردى. ‎

‎ سەنجەر ئۆمەروف يىتەكچىلىكىدىكى كۈن نۇرى بىرلەشمىسى، ھۆكۈمەتنىڭ ئەنجان ۋەقەسىنى قانلىق ‎باستۇرۇشىنى ئەيىبلىگەن. بۇ تەشكىلات شۇنداقلا ئۆزبېكىستاندا سىياسىي ۋە ئىقتىسادىي ئىسلاھات ‎ئېلىپ بېرىشنى تەرغىپ قىلىۋاتقان ئاممىۋىي تەشكىلات ئىدى. (ئارزۇ)‎

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.