Özbékistan amérikidin yardem alghan bir démokratik teshkilatni pichetlidi

• 
  2006-01-13

Özbékistan da'iriliri amérikining yardimige ériship kéliwatqan " erkinlik öyi" namliq bir teshkilatni pichetlidi. Roytérs axbarat agéntliqining xewer qilishiche, özbékistan da'iriliri mezkur teshkilatni ruxsetname almay turup kishilerni intérnét mulazimiti bilen teminlidi, dep eyibligen.

"Erkinlik öyi" amérikidiki tesiri chong kishilik hoquq organlirining biri. Özbékistan erkinlik öyi mezkur teshkilatning yardimige ériship kelmekte idi. Ötken yili 5 - ayda partlighan enjan weqesidin kéyin, özbékistanda terepsiz metbu'atlar we chet'elning yardimi astidiki ammiwi teshkilatlarni basturush kücheytilmekte. Amérika erkinlik öyining özbékistan'gha mes'ul driktori branko sésto, " qolimizdin kélidighan tirishchanliqimizni dawamlashturup, naraziliqimizni bildürimiz" dédi. Uning tekitlishiche, tashkent sheherlik sot mehkimisi erkinlik öyining barliq pa'aliyetlirini toxtitishni buyrighan.

Branko sésko, özbékistanda "yéqinqi 6 aydin béri kishilik hoquq weziyiti we ammiwi jem'iyetlerning ehwali kishini qayghugha salidu " deydu. Enjan weqesidin kéyin b b s ning tashkent ishxanisi taqiwétildi. Erkin yawropa radi'osi muxbirlirining ruxsetnamiliri bikar qilin'ghan. Shuning bilen birge ikki amérika ammiwi teshkilatining özbékistandiki ishxanisi, sot mehkimisi teripidin taqalghan.

Prézidént kerimow, islam esebi küchlirige qarshi küresh qiliwatqanliqini tekitligen bolsimu, biraq terepsiz közetküchiler, uni siyasi, iqtisadi jehette basturush siyasiti yürgüzüsh bilen eyiblimekte. (Erkin)