Өзбекистан кишилик һоқуқ рәһбири әзәмҗанни қолға алди


2006.05.01

Өзбекистан һөкүмити дүшәнбә күни, өзбекистандики атақлиқ кишилик һоқуқ паалийәтчиси вә өзбекистан кишилик һоқуқ җәмийитиниң рәиси әзәмҗан фәрманофни сахтипәзлик қилмиши билән қолға алғанлиқини билдүрди. Лекин фәрманофниң қоллиғучилири, һөкүмәтниң уни сиясий сәвәбләрдин қолға алғанлиқини тәкитлимәктә.

Өзбекистан ички ишлар министирлиқиниң билдүрүшичә, фәрманоф йәкшәнбә күни өзбекистанниң гүлистан шәһиридә қоймичилиқтин тапқан пулни еливатқан мәзгилдә қолған илинған.

Өзбекистан ички ишлар министирлиқи елан қилған баянатида, әзәмҗан фәрманофниң гунаһини етирап қилғанлиқини тәкитләп, кишилик һоқуқ тәшкилатлириниң униң сиясий сәвәбләрдин қолған елинғанлиқи тоғрисидики шикайәтлирини рәт қилди. Әмма, өзбекистан кишилик һоқуқ җәмийити дүшәнбә күни елан қилған баянатида, әзәмҗан фәрманофниң, йеқинда йезип елан қилған "дозақдики деһқанлар" намлиқ мақалиси түпәйлидин қолға елинғанлиқини билдүрди. Мәзкур мақалидә өзбекистан һөкүмитиниң, өзбекистанниң җизақ районидики пахта терийдиған деһқанларниң һоқуқини қандақ дәпсәндә қиливатқанлиқи оттуриға қоюлған.

Өзбекистан дуняда әң көп пахта експорт қилидиған дөләт болуп, һөкүмәт деһқанларни пахта теришқа зорлап, уларниң мәһсулатлирини әрзан баһада сетивалидикән.

Өзбекистан президенти ислам кәримоф, өткән йили май ейида әнҗан шәһиридики һөкүмәткә қарши наразилиқ намайиши өзбекистан һөкүмити тәрипидин қанлиқ бастурулғандин кейин, өзбекистандики аммивий тәшкилатлар вә сиясий өктичи паалийәтләргә қаратқан бастуруш һәрикитини техиму күчәйтти. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.