Özbékistan xelqining kélechekke bolghan ümidi

Jüme küni özbékistan hökümiti, özbékistan musteqilliqning 16 yilliqini daghdughuluq murasimlar bilen xatirilidi. Lékin xewerlerge qarighanda, özbékistanda musteqilliq künini xatirilesh üchün ötküzülgen murasimlarda, özbékistan xelqi kélechek heqqide künsiri köpiyiwatqan endishisini yoshuralmighan.

Roytris agéntliqining xewer qilishiche, tashkentte ötküzülgen murasimda söz qilghan özbékistan prézidénti islam kerimof, " ötken 16 yil ichide démokratik bir dölet qurush we xelqning turmush ehwalini yaxshilash üchün qilghan xizmetlirimizni héchkim inkar qilalmaydu" dégen . Lékin, u prézidént wezipisini bashqa bir kishige tapshurush- tapshurmasliq mesilisi heqqide héchqandaq söz qilmighan.

1989‏- Yilidin béri hakimiyet béishida turuwatqan islam kerimofning wezipe ötesh mudditi aldimizdiki dékabir éyida axirlishidu. Asasiy qanun boyiche prézidént kerimofning yene bir qétim özini prézidéntliqqa namzat körsitishi mumkin emes. Lékin u hazirghiche, prézidént wezipisini tapshurush yaki tapshurmasliq mesilside ochuq bir néme démigen.

Gerche prézidént kerimof, tashkentte qilghan sözide, démokratik bir dölet qurushqa tirishqanliqini tekitligen bolsimu, emma xelq'ara kishilik hoquq teshkilatliri hemde amérika qatarliq bezi gherb döletliri, özbékistanni dunyadiki kishilik hoquqni eng köp depsende qiliwatqan we puqralirining erkinlikini eng köp cheklewatqan döletler qatarida körsetmekte.

Özbékistanning amérika we gherb döletliri bilen munasiwetliri bolupmu, 2005‏- yili özbékistanning enjan shehiride yüz bergen qanliq basturush herikitidin kéyin, téximu keskinleshti.

Xewerlerge qarighanda, özbékistan bilen amérika qatarliq gherb döletliri arisidiki munasiwetlerdiki keskinlik, jüme küni tashkentte ötküzülgen murasimlarda éytilghan naxshilardimu ochuq-ashkara ipadilen'gen. (Ömer qanat)