Америка өзбекистан билән болған мунасивәтни яхшилаш нийитини ипадилиди


2006-08-09
Share

Америкиниң ярдәмчи ташқи ишлар министири ричард бошер өзбекистан президенти ислам кәримоф билән сөһбәтләшкәндин кейин, америкиниң өзбекистан билән болған мунасивәтни яхшилашни халайдиғанлиқини билдүрди.

Ричард бошер мухбирларни күтивелиш йиғинида қилған сөзидә, "биз бу йәрдә башқа күчләрдин бир нәрсә талишишни ойлашмидуқ. Биз өзбекистанниң русийә, хитай, яропа бирлиги вә түркийигә охшаш башқа һәр қандақ дөләтләр билән болған мунасивәтни давамлиқ сақлап қелишини халаймиз" деди.

У сөзидә йәнә, " биз өзбекистанниң башқа пурсәт вә таллашларни қолға кәлтүришигә ярдәм қилалаймиз дәп қараймиз. Шундақла биз өзбекистан билән йеңи һәмкарлиқ түзүшни халаймиз" дәп көрсәткән. Әмма у бу йеңи һәмкарлиқларниң қандақ елип берилидиғанлиқида тәпсилий тохталмиди. Ричард бошер чаршәнбә күни ташкәнттә өзбекистан президенти ислам кәримоф вә ташқи ишлар министири виладимир норов билән сөһбәтләшкән. У пәйшәнбә күни қирғизистанни зиярәт қилмақчи.

Америка әндиҗан вәқәсидә өзбекистанни әйиблигәндин кейин, ислам кәримоф америка билән 2001‏- йилидики 11‏-сентәбир вәқәсидин буян давамлаштурған достлуқ мунасивитини бирдинла үзүп, америкиниң һәрбий базисини тақиди һәмдә нурғун чәтәл мәблиғи билән қурулған һөкүмәтсиз тәшкилатларни тақиған иди.(Пәридә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт