Amérika özbékistan bilen bolghan munasiwetni yaxshilash niyitini ipadilidi

Amérikining yardemchi tashqi ishlar ministiri richard boshér özbékistan prézidénti islam kerimof bilen söhbetleshkendin kéyin, amérikining özbékistan bilen bolghan munasiwetni yaxshilashni xalaydighanliqini bildürdi.

Richard boshér muxbirlarni kütiwélish yighinida qilghan sözide, "biz bu yerde bashqa küchlerdin bir nerse talishishni oylashmiduq. Biz özbékistanning rusiye, xitay, yaropa birligi we türkiyige oxshash bashqa her qandaq döletler bilen bolghan munasiwetni dawamliq saqlap qélishini xalaymiz" dédi.

U sözide yene, " biz özbékistanning bashqa purset we tallashlarni qolgha keltürishige yardem qilalaymiz dep qaraymiz. Shundaqla biz özbékistan bilen yéngi hemkarliq tüzüshni xalaymiz" dep körsetken. Emma u bu yéngi hemkarliqlarning qandaq élip bérilidighanliqida tepsiliy toxtalmidi. Richard boshér charshenbe küni tashkentte özbékistan prézidénti islam kerimof we tashqi ishlar ministiri wiladimir norow bilen söhbetleshken. U peyshenbe küni qirghizistanni ziyaret qilmaqchi.

Amérika endijan weqeside özbékistanni eyibligendin kéyin, islam kerimof amérika bilen 2001‏- yilidiki 11‏-séntebir weqesidin buyan dawamlashturghan dostluq munasiwitini birdinla üzüp, amérikining herbiy bazisini taqidi hemde nurghun chet'el meblighi bilen qurulghan hökümetsiz teshkilatlarni taqighan idi.(Peride)