Yawropa ittipaqi özbékistan'gha qaratqan cheklimilerni közdin kechürüshni kéchiktürdi

Yawropa ittipaqi, xelq'ara kishilik hoquq teshkilatlirining bésimi bilen özbékistan'gha qarita yolgha qoyghan iqtisadiy we siyasiy cheklimilerni küzdin kechürüsh mesilisini ikki ay kéchiktürdi.

Xelq'ara kechürüm teshkilati we xelq'ara kishilik hoquqni küzitish teshkilati qatarliq kishilik hoquq teshkilatliri, özbékistanda kishilik hoquq weziyitining künséri éghirlishiwatqanliqini tekitlep, yawropa ittipaqining özbéksitan'gha qarita yolgha qoyghan iqtisadiy we siyasiy cheklimilerni bikar qilishini emes, téximu kéngeytishni muzakire qilishi kéreklikini bildürmekte.

2005‏- Yili özbékistan hökümiti enjan shehiride élip bérilghan naraziliq herikitini qanliq basturghandin kéyin, yawropa ittipaqi özbékistan bilen siyasiy , iqtisadiy we téxnik sahelerdiki hemkarliqlargha cheklime qoyup, özbéksitan'gha qoral sétishni hemde özbékistanning aliy derijilik hökümet erbablirining yawropa döletlirini ziyaret qilishini chekligen idi.

Ötken yili noyabir éyida yawropa ittipaqi özbékistan bilen téxnik sahesidiki hemkarliqqa qoyulghan cheklimini bikar qilip, bashqa sahelerdiki cheklimilerning bikar qilinishi, özbékistandiki kishilik hoquq weziyitining yaxshilinishigha qarashliq, dep körsetken idi.

Siyasiy mulahizichilerning éytishiche, yawropa ittipaqining, özbékistan'gha qarita yolgha qoyulghan iqtisadiy we siyasiy cheklimiler üstidiki muzakirilerni ikki ay kéchiktürgenliki, özbékistanning kishilik hoquq weziyitide héchqandaq ilgirlesh bolmighanliqining bir ipadisi iken. (Qanat)