ئۆزبېكىستان ھۆكۈمىتى پەيشەنبە كۈنى بريۇسسېلدا ئۆتكۈزۈلگەن شىمالىي ئاتلانتىك ئوكيان ئەھدى تەشكىلاتىغا ئەزا دۆلەتلەرنىڭ مىنىستىرلار يىغىنىغا دۆلەت مۇداپىئە مىنىستىرىنى ئەۋەتىشنى رەت قىلدى.
رويتىرس ئاگېنتلىقىنىڭ خەۋىرىگە قارىغاندا، ئۆزبېكىستان شىمالىي ئاتلانتىك ئوكيان ئەھدى تەشكىلاتى ياۋرو- ئاتلانتىك ھەمكارلىق كېڭىشىگە ئەزا بولغاچقا، ئەسلىدە بۇ يىغىنغا قاتنىشىش سالاھىيىتى بار ئىكەن. بىراق تاشكەنت دائىرىلىرى دۆلەت مۇداپىئە مىنىستىرىنىڭ باشقا ۋەزىپىسى بارلىقىنى بىلدۈرۈپ، يىغىنغا ۋەكىل ئەۋەتمىگەن.
شىمالىي ئاتلانتىك ئوكيان ئەھدى تەشكىلاتى ئۆزبېكىستان ھۆكۈمىتىنىڭ ئەنجاندىكى خەلق قارشىلىق ھەرىكەتلىرىنى باستۇرۇشىنى ئەڭ قاتتىق ئەيىپلىگەن خەلقئارا ئورگانلارنىڭ بىرى . ئۇ ئەنجاندا ئۆتكەن ئايدا يۈز بەرگەن ھۆكۈمەت ئارمىيىسىنىڭ نامايىشچى خەلققە ئوق چىقىرىش ۋەقەسى ئۈستىدىن خەلقئارالىق تەكشۈرۈش ئېلىپ بېرىشنى ئىزچىل تۈردە تەلەپ قىلماقتا.
ئۇ قېتىمقى ۋەقەدە ئۆزبېكىستان ھۆكۈمىتى 170 نەچچە ئادەمنىڭ ئۆلگەنلىكىنى، ئۆلگەنلەرنىڭ كۆپىنچىسىنىڭ " تېررورچىلار" ئىكەنلىكىنى بىلدۈرگەن. كىشىلىك ھوقۇق تەشكىلاتلىرى ۋە يەرلىك خەلق بولسا، ۋەقەدە 500 دىن ئارتۇق پۇقرانىڭ بىگۇناھ ئۆلتۈرۈلگەنلىكىنى كۆرسەتكەن.
شىمالىي ئاتلانتىك ئەھدى تەشكىلاتىنىڭ ئەمەلدارى ئەنجاندىكى ۋەقە مۇناسىۋىتى بىلەن مەزكۇر تەشكىلاتنىڭ ئۆزبېكىستاندىكى بەزى پائالىيەتلىرىنى توختۇتۇپ، مەزكۇر دۆلەت بىلەن بولغان مۇناسىۋىتىنى قايتا كۆزدىن كەچۈرىۋاتقانلىقىنى بىلدۈردى.
ئۇ يەنە ،شىمالىي ئاتلانتىك ئوكيان ئەھدى تەشكىلاتىنىڭ يىغىنىدا، رۇسىيە دۆلەت مۇداپىئە مىنىستىرى بىلەن ئۆزبېكىستان مەسىلىسىنى مۇزاكىرە قىلىپ، رۇسىيىنىڭ ئۆزبېكىستانغا بېسىم ئىشلىتىشىنى قولغا كەلتۈرۈشنى ئۈمىد قىلىدىغانلىقىنى ئىپادىلىدى.
بىراق رۇسىيە دۆلەت مۇداپىئە مىنسىتىرى سېرگىي ئىۋانوف بۇنىڭ ئالدىدىراق، ئۆزبېكىستاندا خەلقئارا تەكشۈرۈش ئېلىپ بېرىشنى قوللىمايدىغانلىقىنى بىلدۈرۈپ، ئىسلام كەرىموف ھۆكۈمىتىنى قوللايدىغانلىقىنى قايتا تەكىتلىگەن.
مەلۇماتلارغا قارىغاندا، خەلقئارالىق تەكشۈرۈشنى رەت قىلىۋاتقان ئۆزبېكىستان ھۆكۈمىتى غەربتىن كېلىدىغان بېسىمنى ئازلىتىش ئۈچۈن، چارشەنبە كۈنى ئۆزىنى ياقلايدىغان رۇسىيە، خىتاي، ئىران، ھىندىستان قاتارلىق دۆلەتلەرنىڭ دىپلوماتلىرىنى ئەنجاندىكى قانلىق ۋەقە ئۈستىدىكى تەكشۈرۈشلىرىنى نازارەت قىلىشقا تەكلىپ قىلغان. (ئارزۇ)