Özbékistan shimaliy atlantik ehdi teshkilatining ministirlar yighinigha wekil ewetishni ret qildi

Özbékistan hökümiti peyshenbe küni bryussélda ötküzülgen shimaliy atlantik okyan ehdi teshkilatigha eza döletlerning ministirlar yighinigha dölet mudapi'e ministirini ewetishni ret qildi.

Roytirs agéntliqining xewirige qarighanda, özbékistan shimaliy atlantik okyan ehdi teshkilati yawro- atlantik hemkarliq kéngishige eza bolghachqa, eslide bu yighin'gha qatnishish salahiyiti bar iken. Biraq tashkent da'iriliri dölet mudapi'e ministirining bashqa wezipisi barliqini bildürüp, yighin'gha wekil ewetmigen.

Shimaliy atlantik okyan ehdi teshkilati özbékistan hökümitining enjandiki xelq qarshiliq heriketlirini basturushini eng qattiq eyipligen xelq'ara organlarning biri . U enjanda ötken ayda yüz bergen hökümet armiyisining namayishchi xelqqe oq chiqirish weqesi üstidin xelq'araliq tekshürüsh élip bérishni izchil türde telep qilmaqta.

U qétimqi weqede özbékistan hökümiti 170 nechche ademning ölgenlikini, ölgenlerning köpinchisining " térrorchilar" ikenlikini bildürgen. Kishilik hoquq teshkilatliri we yerlik xelq bolsa, weqede 500 din artuq puqraning bigunah öltürülgenlikini körsetken.

Shimaliy atlantik ehdi teshkilatining emeldari enjandiki weqe munasiwiti bilen mezkur teshkilatning özbékistandiki bezi pa'aliyetlirini toxtutup, mezkur dölet bilen bolghan munasiwitini qayta közdin kechüriwatqanliqini bildürdi.

U yene ,shimaliy atlantik okyan ehdi teshkilatining yighinida, rusiye dölet mudapi'e ministiri bilen özbékistan mesilisini muzakire qilip, rusiyining özbékistan'gha bésim ishlitishini qolgha keltürüshni ümid qilidighanliqini ipadilidi.

Biraq rusiye dölet mudapi'e minsitiri sérgiy iwanof buning aldidiraq, özbékistanda xelq'ara tekshürüsh élip bérishni qollimaydighanliqini bildürüp, islam kerimof hökümitini qollaydighanliqini qayta tekitligen.

Melumatlargha qarighanda, xelq'araliq tekshürüshni ret qiliwatqan özbékistan hökümiti gherbtin kélidighan bésimni azlitish üchün, charshenbe küni özini yaqlaydighan rusiye, xitay, iran, hindistan qatarliq döletlerning diplomatlirini enjandiki qanliq weqe üstidiki tekshürüshlirini nazaret qilishqa teklip qilghan. (Arzu)