Yawropa birliki qirghizistanda qest qilin'ghan zhurnalist délosini jiddiy tekshürüshni telep qildi

Yawropa birliki qirghizistandin oshta qest qilip öltürülgen zhurnalist, kishilik hoquq pa'aliyetchisi elishir sayipof délosini teltöküs tekshürüshni telep qildi. Roytra agéntliqining birosséldin 10 - ayning 31 ‏- küni xewer qilinishiche, yawropa birlikining nöwettiki prézidénti merhum sayipofning kishilik hoqoq üchün körsetken xizmetlirini teqdirligen we qirghizistan prézidénti qurmanbék baqiyéftin bu déloni teltöküs éniqlap, alte ay ichide, belki téximu téz waqit ichide, jinayetchini qanun buyiche jazalashni telep qildi.

Xewerde bayan qilinishiche, xelq'ara kechürüm teshkilati 'sayipofning qestlep öltürülgenliki sabiq sowét ittipaqining ottura asiya rayonida xelqning pikir bayan qilish erkinlikige qilin'ghan qebih tosalghu' dep körsetti.

Buningdin burun, qirghizistan saqchiliri sayipofning ölümige sewebchi bolushi mumkin bolghan amillardin, u hayat waqtida özbékistan prézidénti islam kérimufni tenqidlep turghanliqi, shu sewebtin u köp qétim sürüshtürülgenliki qatarliq pakitlarni ashkarilighan idi. Shuningdin kéyin, yawrupa birliki özbékistan rehberlirige wiza bérishke cheklime qoydi.

Merhum elishir sayipof özi özbék, qirghizistan puqrasi. U 10 ‏- ayning 24 ‏- küni oshta qestlep öltürülüshtin burun, özbék tilida gézit chiqirip, özbékistanda kishilik hoquqqa xilapliq qilin'ghan weqelerni pash qilip turghan idi. Merhum uningdin burun erkin yawropa radi'osida xizmet qilatti. (Weli)