Өзбекистанда қуяш нури партийисиниң рәһбири сотланди


2006.01.31

Өзбекистанда кәримов һөкүмитини тәнқид қилған сияси өктичи гуруһ - қуяш нури партийисиниң рәһбири санҗар өмәров, дүшәнбә күндин башлап сотлинишқа башлиди. Санҗар өмәров, өткән йили 10 - айда қолға елинғандин кейин, өзбекистан даирилири тәрипидин иқтисади җинайәт садир қилиш билән әйибләнгән. Әмма санҗар өмәровниң қоллиғучилири униң сотлинишини сиясий мәқсәтлик зиянкәшлик, дәп қаримақта.

У, қолға елинғандин кейин ташкәнттики ташқий дуня билән асасән мунасивәт қилмайдиған бир түрмигә соланған. Өмәровниң адвукатиниң б б с ға ашкарилишичә, у өмәров қолға елинип узун өтмәй уни йоқлап барған болуп, уни қипялиңач вә қамлашмиған бир һаләттә көргән.

Униң соти дүшәнбә күни башланди. Сот мәһкимиси униң үстидин 3 - февралғичә кечиктүрмәй һөкүм елан қилиши мумкин. Санҗар өмәров илгири америка билән аиливи алақиси бар содигәр иди. У, тәптиш даирилири тәрипидин қара пул ююш вә башқа иқтисади җинайәтләр билән әйибләнди.

Өткән йили 5 - айда әнҗанлиқ намайишчилар қораллиқ бастурулғандин кейин, санҗар өмәров, кәримов һөкүмитини тәнқид қилип көзгә көрүнүшкә башлиған. Санҗар өмәров сот қилинған шу күни өзбекистан кишилик һоқуқ актипи мутәбәр таҗибайева ташкәнт вилайитидә сотланди. У, франсийә әлчиханиси вә америкидин пул елиш, бу пулларни "аммивий тәртипни бузушқа" ишлитиш қатарлиқ җинайәтләр билән әйибләнгән. Санҗар өмәров қолға елиништин сәл илгири өзбекистан парламентиға хәт йезип, өзбекистанда ислаһат елип беришни тәләп қилған. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.