Qirghizistanda öktichiler herikiti rehbirining öyi partlitiwétildi


2005.03.04

Qirghizistandiki eng chong öktichi küchlerning biri, ata yurt siyasi herikitining rehbiri roza otanbayiwaning öyi peyshenbe küni partlitiwétilgen. Biraq partlash weqeside adem ölmigen.

Béshkektiki muxbirimizning xewer qilishiche, roza otanbayéwa we uning a'ile - tawabati partlash weqesi yüz bergende öyde bolmighanliqtin saq qalghan. Partlash weqesige hazirgha qeder héchqandaq bir partiye yaki shexs jawabkar bolidighanliqini élan qilmidi. Roza otanbayiwa, ilgiri bir mezgil qirghizistanning tashqi ishlar ministirliqini ötigen. U, qirghizistan prézidénti esqer akayéfning qizi bernet akayéfning eng küchlük riqabetchilirining biri, dep qaralmaqta idi.

Xewerlerge qarighanda qirghizistan ichki ishlar ministirliqi, dölet bixeterlik idarisi qatarliq organlar roza otanbayiwaning öyini qamal qilip, partlashning sewebi we jawapkarlirigha da'ir yip uchlirini izdimektiken. Bu weqe qirghizistandiki siyasi weziyet intayin nazuk bir mezgilde yüz bergen.

Yéqinda ötküzülgen parlamént saylimi qirghizistanning sherqiy we jenubidiki bir qisim oblastlarda puqralarning naraziliqini keltürüp chiqarghan idi. Jalal'abadtiki saylamgha narazi bolghan puqralar, bir qanche kündin béri nuqin rayonidiki hökümet binalirini qorshiwalghan. Közetküchiler nuqindiki saylam ixtilabi rayonda étnik toqunushni keltürüp chiqirishi mumkin, dep agahlandurmaqta. Chünki bu rayonda özbéklerning nupusi xéli salmaqni igileydiken. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.