Qazaqistanda öktichi siyasiy partiyining pa'aliyiti cheklendi


2005.01.12

Qazaqistan démokratik tallash partiyisi almuta sheherlik sot mehkimisining hökmige qattiq naraziliq bildürüp, sotning hökmi qazaqistanda ukra'iniyidikige oxshash "qizghuch inqilab" yüz bérip qilishining aldini élish üchün, hökümetning öktichi siyasiy guruhlargha qarshi bashlighan basturush herikitining bir qismi dep körsetti . Sot , qazaqistan démokratik tallash partiyisini dölet bixeterlikige dexli - terüz qilghan we hökümetni aghdurushqa urun'ghan dep eyibligen .

Lékin, mezkur partiyining adwokati yifgini zhowtis almatada ötküzülgen muxbirlarni kütüwilish yighinida bergen bayanatida, qazaqistandiki hakimiyet siyasiy basturush yoligha qarap mangdi. Hakimiyetning bu yolni tallishida ukra'iniyidiki weqeler muhim rol oynighanliqi iniq, didi .

Sotning hökmini siyasiy bir oyun dep körsetken qazaqistan démokratik tallash partiyisining yuqiri derijilik xadimliridin pitir siwyik" hökümet bizning pa'aliyitimizni cheklesh arqiliq bizni esebiy, radikal bir teshkilat dep körsetmekchi. Bizning meqsitimiz inqilab qilish emes, asasiy qanun ramkisi ichide qazaqistanda siyasiy islahat élip bérish. Ukra'iniye we groziyidiki siyasiy özgirishler qazaqistandiki hakimiyet da'irlirini chüchütiwetken bolushi mumkin, didi.

Köpchilikke melum bolghandek, ukra'iniyidiki qansiz "qizghuch inqilap" yüzminglighan kishining ukra'iniye saylam komitéti teripidin prézidént saylimida yéngildi dep élan qilin'ghan öktichi siyasiy heriketning rehbiri wiktor yushinkoni qollap, keng kölemlik namayishlar ötküzüshige sewep bolghan . Axirida saylam netijisi saylamda saxtipezlik weqeliri yüz bergenliki üchün bikar qilinip, saylam qaytilan'ghan idi .

Qazaqistan prézidéntining siyasiy meslihetchisi yarmuhemmet yirtishayuf, hökümetning qazaqisitandiki siyasiy öktichi heriketni basturushni we hökümetni qollimighan gézit- zhornallarni taqashni meqset qilmighanliqini bildürdi . Uning éytishiche, ukra'iniyide yüz bergen "qizghuch inqilab" ning qazaqistanda yüz bérishi mumkin emes. Chünki qazaqisitandiki weziyetni groziye we ukra'iniyi'idiki weziyet bilen silishturghili bolmaydiken .

Lékin, qazaqistan démokratik tallash partiyisining adwokati zhowtisning bildürüshiche, ukra'iniyidiki prézidént saylimida yushinkoning saylamda ghelibe qilghanliqi, qazaqistandiki hakimiyetni chöchütiwetken . Chünki, bu weqe, eger sabiq sowét jumhuriyetliride adaletlik saylam élip bérilsa, öktichi siyasiy heriket rehberlirining saylamda ghelbe qilalaydighanliqini ispatlighan.

Amérika birleshme agéntliqining xewer qilishiche, qazaqistan démokratik tallash partiyisi düshenbe küni, qanuniy yollar arqiliq sotning hökümige qarshi turidighanliqini we qazaqistanda démokratik islahat élip bérilishi üchün kürishini dawamlashturidighanliqini bildürdi .

Qazaqistanda, démokratik tallash partiyisining pa'aliyitining cheklen'genliki, qazaqsitandiki siyasiy öktichi guruhlar we kishilik hoquq teshkilatliriningla emes, xelq'aradiki kishilik hoquq teshkilatliriningmu diqqitini qozghidi .

Xelq'ara kishilik hoquq teshkilati bolghan amérikidiki erkinlik sariyi seyshenbe küni bir bayanat élan qilip, qazaqistan démokratik tallash partiyisining pa'aliyitining cheklen'genlikini, qazaqistanda démokratiyining arqigha chékinishni dep körsetti .

Erkinlik sariyining dériktori jenifer winzor, qazaqistan sotining démokratik tallash partiyisi heqqidiki hökmi, qazaqistanda démokratiyining tereqqi qilishini kütken nurghun kishilerni ümidsizlendüridu. Biz prézidént nezerbayof hökümitidin sotning dimokratik tallash partiyisi heqqide chiqarghan hökmini derhal közdin kechürüshini hemde hökmining bikar qilinishi üchün jiddi tirishchanliq körsitishini telep qilimiz, didi . (Qanat)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.