Qazaqistan 20 tomluq " qazaq xelqining pelsepiwi mirasliri" ni neshir qilishni bashlidi

Qazaqistan ijtima'iy pen alimliri, bolupmu pelsepichiliri kolléktip küch chiqirish arqiliq "qazaq xelqining qedimdin taki hazirghiche bolghan pelsepiwi mirasliri" dégen mawzuda 20 tom eser neshir qilish pilanini bashlap, uning tunji tomi " medeniyet mirasliri" ni neshir qilip tarqatqan hemde bu munasiwet bilen muxbirlarni kütüwélish murasimi ötküzgen. Bu tom qazaqistan pelsepe we siyasetshunasliq institutining rehbiri, akadémik abdimalik nisanbayéwning yétekchiligide yoruqqa chiqqan.

Ottura asiya uchur agéntliqining xewer qilishiche, mezkur 20 tomluq eser sabiq sowét ittipaqi tupraqlirida tunji qétim milliy dölet tilida teyyarlinidighan chong hejimlik emgek bolup, buninggha qazaqlarning pelsepisi, dunya qarashliri, edebiyati shuningdek dunya medeniyitining meshhur netijiliri kirgüzilidiken.

20 Tomning hemmisi aldi bilen qazaq tilida teyyarlinip neshir qilinidiken, lékin, bildürüshlerge qarighanda, 2009-yili yene tunji qétim in'gliz tilida besh tomluq " qazaq pelsepisi" neshir qilinip tarqitilmaqchi.

Yéqinqi yillardin buyan qazaqlarning milliy döletchilik hem milletperwerlik éngining ösüshige egiship, qazaq ziyaliyliri öz tarixiy mirasliri hem medeniyitini qedirlesh hem uni qaytidin yézip chiqip, jahan xelqighe tonushturush xizmetlirini bashlighan. Qazaqistandiki bir Uyghur tarixchisining inkas qilishiche yéngidin tüzülgen qazaqistan we qazaq tarixi, qazaq klassik edebiyat tarixi hem bashqa eserlerde mehmut qeshqeri, yüsüp xas hajip, el farabi we ulardin kéyinki klassiklar oxshashla qazaq xelqining ortaq medeniy bayliqi katégoriyisige kirgüzülgen. (Ümidwar)