نازاربايېف " سايلامنىڭ ئادالەتلىك ئۆتكۈزۈلىدىغانلىقىغا كاپالەتلىك قىلىمەن "
2007.07.05
قازاقسىتان پرېزىدېنتى نۇر سۇلتان نازاربايېف كېلەر ئاي قازاقىستاندا ئۆتكۈزۈلىدىغان پارلامىنت سايلىمىنىڭ، ئادالەتلىك بىر سايلام بولىدىغانلىقىنى بىلدۈردى.
پرېزىدېنتى نازاربايىف چارشەنبە كۈنى، نۇر ئوتان پارتىيىسىنىڭ قۇرۇلتىيىدا قىلغان سۆزىدە، " قازاقىستان دۆلەت رەئىسى بولۇش سۈپىتىم بىلەن، سايلامنىڭ ئادالەتلىك ئۆتكۈزۈلىدىغانلىقىغا ۋە سايلامدا خەلقىنىڭ ھەقىقىي قوللىشىغا ئىگە پارتىيىلەرنىڭ غەلىبە قىلىدىغانلىقىغا كاپالەتلىك قىلىمەن" دېدى.
لېكىن نازاربايېف سۆزىدە، سايلامدا نۇر ئوتان پارتىيىسىنىڭ غەلىبە قىلىدىغانلىقىغا ئىشىنىدىغانلىقىنى تەكىتلىدى. كۆپچىلىككە مەلۇم بولغاندەك، بۇ يىلنىڭ باشلىرىدا قازاقىستان ئاساسىي قانۇنىغا كىرگۈزۈلگەن، دۆلەت رەئىسىنىڭ سىياسىي پارتىيىلەرنىڭ رەئىسى بولالايدىغانلىقى توغرىسىدىكى ئۆزگەرتىشتىن كېيىن، پرېزىدېنت نازاربايېف نۇر ئوتان پارتىيىسىنىڭ رەئىسىلىك ۋەزىپىسىنى رەسمىي قولغا ئالغان ئىدى.
بۇ ئارىدا، پرېزىدېنت نازاربايېفنىڭ چوڭ قىزى دارىغا نازاربايىۋا، ئۆزلىرىنى نۇر ئوتان پارتىيىسىدىن كېلەر ئاي قازاقىستاندا ئۆتكۈزۈلىدىغان پارلامىنت سايلىمىدا نامزات كۆرسەتكەن پارتىيە ئەزالىرى تىزىملىكىدىن چىقىرىۋېتىلدى. دارىغا نازاربايېۋانىڭ نامزاتلىقىنى بىكار قىلىش توغرىسىدىكى قارار، چارشەنبە كۈنى قازاقىستاننىڭ پايتەختى ئاستانا شەھىرىدە نۇر ئوتان پارتىيىسىنىڭ پرېزىدېنت نازاربايىفنىڭ رىياسەتچىلىكىدە ئېلىپ بېرىلغان قۇرۇلتىيىدا ئېلىنغان.
كۆپلىگەن سىياسىي مۇلاھىزىچىلەر، قازاقىستاندا نۇرغۇن سىياسىي ۋە ئىقتىسادىي نوپۇزغا ئىگە ۋە 2004- يىلىدىن بېرى قازاقىستان پارلامېنتىنىڭ ئەزاسى بولغان دارىغا نازاربايىۋانى كېلەچەكتە، پرېزىدېنت نەزەربايىفنىڭ ئورنىنى ئالىدىغان كىشى دەپ، قاراپ كەلگەن. (ئەقىدە)
مۇناسىۋەتلىك ماقالىلار
- نەزەربايىف، خەلق قوللىغانلىقى ئۈچۈن ئاساسىي قانۇندىكى ئۆزگىرىشنى ماقۇللىغانلىقىنى بىلدۈردى
- نازاربايېف، كاسپىي دېڭىز نېفىت تۇرۇبىسىنى خىتايغا تۇتاشتۇرۇش ھەققىدە ۋەدە بەردى
- قازاقىستان خىتاي ھەربىلىرىنىڭ كىرىشىگە يول قويمايدۇ
- قازاقىستان پرېزىدېنتى، كۆيئوغلى ئەلىيىفنى ۋەزىپىسىدىن ئېلىپ تاشلىدى
- قازاقىستان راھەت ئالىيېۋنىڭ كونتروللىقىدىكى تېلېۋىزىيە قانىلى ۋە بىر گېزىتنى تاقىدى
- نۇرسۇلتان نەزەربايىفنىڭ سالاھىيىتىنىڭ كۈنسېرى ئېشىشى غەرب دۆلەتلىرىنى ئەندىشىلەندۈرمەكتە
- قازاقىستان پارلامېنتى نەزەربايېۋنىڭ مەڭگۈلۈك پرېزىدېنت بولۇشىنى ماقۇللىدى
- 9 - ماي غالىبىيەت بايرىمىنىڭ 62 يىللىقى ئالماتادا داغدۇغىلىق خاتىرىلەندى