Qazaqistan kéngesh palata re'isi toqayif ürümchide qazaq tetqiqatchilar bilen söhbet ötküzdi

28 - Yanwar qazaqistan parlaménti aliy kéngesh palatasi re'isi toqayif Uyghur élide ziyarette bolush jeryanida, qazaq tetqiqati bilen shughullinidighan bir qisim qazaq tetqiqatchilar bilen söhbet yighini ötküzgen bolup, söhbet yighinida ikki terep qazaq tarixi we medeniyitidiki tetqiqat netijiliridin ortaqlishish arzusi barliqini ilgiri sürgen.

Tengritagh torida körsitishiche, mezkur söhbet yighinigha Uyghur aptonom rayoni xelq qurultiyi da'imiy komitéti mudiri erkin imir baqi we siyasi kéngesh re'isi esqet kerimbay qatarliqlar qatnashqan.

Xewerde körsitilishiche, Uyghur aptonom rayoni ijtima'iy penler akadémiyisi bashliqi myaw pushéng we bir qisim qazaq millitidin bolghan tarix tetqiqatchiliri ishtirak qilghan we ayrim - ayrim halda qazaq millitining tarixi tetqiqati jehetlerde qolgha keltürgen ilmiy netijilerni tonushturghan we qazaqistanning tarix we medeniyet ehwali üstide pikir almashturghan.

Xewerde otturigha qoyulushiche, söhbet yighini jeryanida Uyghur aptonom rayonidiki qazaq tetqiqatchilar we qazaqistan alimliri qazaq tarixi we medeniyiti heqqide chongqurlap munazire we muhakime élip barghan bolup, ular kelgüside ilim saheside alaqini kücheytish, ilmiy netijilerdin öz-ara behriman bolush arzusini bildürüshken.

Emma, bir qisim qazaq we qirghiz tetqiqatchilirining eserliridiki Uyghur tarixi we medeniyitige a'it pakitlargha köz yumush xahishi alimlar arisida ghulghula peyda qiliwatqan bir peytte, xitay hökümitining bu xil pa'aliyetlerni uyushturushi shuningdek muhakime yighinida qazaqistanda yashaydighan Uyghurlarning tarixi we medeniyiti jehetlerde élip bérilghan tetqiqat we bu sahede qolgha keltürülgen netijiler yaki qandaq xizmetler ishlen'genliki heqqide héchqandaq pikirlerning otturigha chiqmighanliqi chet'ellerdiki tetqiqatchilarni hemde Uyghur teshkilatlirini te'ejjüplendürmekte. (Jüme)