Алтунбекниң өлүми сәвәбидин қазақистанниң бихәтәрлик министири истипа бәрди


2006-02-22
Share

Қазақистан бихәтәрлик комитетиниң башлиқи нартай дутбайев қол астидики бир нәччә кишиләрниң, қазақистандики даңлиқ сиясий өктичи алтинбек сәрсанбайевниң өлүмигә четилип қалғанлиқи сәвәбидин чаршәнбә күни хизмитидин истипа бәрди.

Қазақистандики өктичиләр алтинбек өлүминиң бир сиясий сүйқәст болуп, буниңда бихәтәрлик органлириниң қоли барлиғини билдүргән иди. Бу җинайәтни садир қилған дегән гуман билән қолға елинған 6 кишиниң ичидә 5 и бихәтәрлик идарисиниң адәмлири болуп чиққан.

Нартай дутбайев истипа хетини президент нурсултан назарбайевға тапшурған һәмдә мухбирларни күтивелиш йиғинида, " мән һазирқи бу вәзийәттә өзәмни дөләт бихәтәрлик комитетиға башлиқ болушқа виҗданий җәһәттин һоқуқлуқ әмәс дәп қараймән " дәйду. У йәнә, қолға елинған бихәтәрлик идарисиниң хадимлирини " кәспий мәҗбурийитигә вә хәлқниң мәнпәәтигә сатқунлуқ қилған"дәп әйибләп, уларниң чоқум җазалиниши керәкликини әскәрткән.

Президент нурсултан назарбайев чаршәнбә күни наратай дутбайев билән көрүшкән һәмдә униң истипа бериш илтимасини қобул қилған. Даңлиқ сиясий өктичи алтинбек сәрсанбайев қазақистан нағиз ақ йол партийисиниң рәһбири болуп, у 11‏- феврал күни гөрүгә елинип шопури билән биргә етип өлтүрүлгән. Вәқәдин кейин америкиниң қазақистанда турушлуқ әлчиханиси баянат елан қилип, қазақистан һөкүмитини бу вәқә үстидин "дәрһал вә тәлтөкүс" тәкшүрүш елип беришни тәләп қилған иди. (Пәридә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт