Қазақистанда сайлам җәрянида намайиш қилишни чәкләйдиған қанунға өзгәртиш киргүзүлди


2006.12.25

Қазақистан президенти нурсултан нәзәрбайеф дүшәнбә күни, сайлам җәрянида наразилиқ намайиши елип беришни чәклигән қануниға киркүзүлгән өзгиришни мақуллиди.

Мушу айниң башлирида явропа бихәтәрлик вә һәмкарлиқ тәшкилати, тәшкилатниң демократик өлчәмлиригә риайә қилмиғанлиқи үчүн, қазақистанниң явропа бихәтәрлик вә һәмкарлиқ тәшкилатиниң рәисилики үстидә аваз беришни келәр йилиғичә кечиктүргән иди.

Сайлам җәрянида наразилиқ намайиши елип беришни чәклигән қанунға өзгириш киргүзүш ноябир ейида қазақистан парламенти тәрипидин қобул қилинған. Мәзкур қанун 2005‏- йили қазақистанда елип берилған президент сайлими һарписида йолға қоюлған иди. Бу сайламда нәзәрбайеф сайламда берилгән авазларниң 91 пирсәнтини қолға кәлтүргән. Лекин явропа бихәтәрлик вә һәмкарлиқ тәшкилати сайлам назарәтчилири, қазақистан президент сайлимини тәнқид қилип, сайламниң демократик өлчәмләргә мувапиқ елип берилмиғанлиқини җакарлиған иди. Шундақла ғәрб дөләтлири 17 йилидин бери қазақистанда һөкүмранлиқ қиливатқан президент нәзәрбайифни, өктичиләргә бесим ишлитип, мәтбуат әркинликини чәклигән дәп қаттиқ тәнқид қилған.

Сиясий мулаһизичиләрниң ейтишичә, президент нәзәрбайифниң явропа бихәтәрлик вә һәмкарлиқ тәшкилатиниң тәнқидлирини қобул қилип, сайлам җәрянида наразилиқ намайишлири елип беришни чәклигән қанунни бикар қилғанлиқи, униң, русийә вә хитай билән болған мунасивәтлирини тәңпуңлаштуруш үчүн ғәрб дөләтлири билән яхши мунасивәт қуруш арзусиниң бир ипадиси икән. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.