Qazaqistanda saylam jeryanida namayish qilishni chekleydighan qanun'gha özgertish kirgüzüldi


2006.12.25

Qazaqistan prézidénti nursultan nezerbayéf düshenbe küni, saylam jeryanida naraziliq namayishi élip bérishni chekligen qanunigha kirküzülgen özgirishni maqullidi.

Mushu ayning bashlirida yawropa bixeterlik we hemkarliq teshkilati, teshkilatning démokratik ölchemlirige ri'aye qilmighanliqi üchün, qazaqistanning yawropa bixeterlik we hemkarliq teshkilatining re'isiliki üstide awaz bérishni kéler yilighiche kéchiktürgen idi.

Saylam jeryanida naraziliq namayishi élip bérishni chekligen qanun'gha özgirish kirgüzüsh noyabir éyida qazaqistan parlaménti teripidin qobul qilin'ghan. Mezkur qanun 2005‏- yili qazaqistanda élip bérilghan prézidént saylimi harpisida yolgha qoyulghan idi. Bu saylamda nezerbayéf saylamda bérilgen awazlarning 91 pirsentini qolgha keltürgen. Lékin yawropa bixeterlik we hemkarliq teshkilati saylam nazaretchiliri, qazaqistan prézidént saylimini tenqid qilip, saylamning démokratik ölchemlerge muwapiq élip bérilmighanliqini jakarlighan idi. Shundaqla gherb döletliri 17 yilidin béri qazaqistanda hökümranliq qiliwatqan prézidént nezerbayifni, öktichilerge bésim ishlitip, metbu'at erkinlikini chekligen dep qattiq tenqid qilghan.

Siyasiy mulahizichilerning éytishiche, prézidént nezerbayifning yawropa bixeterlik we hemkarliq teshkilatining tenqidlirini qobul qilip, saylam jeryanida naraziliq namayishliri élip bérishni chekligen qanunni bikar qilghanliqi, uning, rusiye we xitay bilen bolghan munasiwetlirini tengpunglashturush üchün gherb döletliri bilen yaxshi munasiwet qurush arzusining bir ipadisi iken. (Qanat)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.