Qazaqistan prézidént saylimi bu yil dékabirgha orunlashturuldi

Qazaqistandiki nazarbayéf hökümiti bilen öktichi küchler arisidiki bir mezgillik talash-tartishtin kéyin, qazaqistan da'iriliri jüme küni prézidént saylimini bu yil dékabirgha orunlashturghanliqini jakarlidi.

Fransiye axbarat agéntliqining xewer qilishiche, prézidént saylimi 2005 - yili dékabirning birinchi yekshenbe künige yeni 12 - ayning 4 - künige békitilgen. Nazarbayéf hökümiti ilgiri prézidént saylimini 2006 - yili dékabirda ötküzüshni tekitligen bolup, buninggha qazaqistan öktichiliri küchlük qarshi turghan idi.

Qazaqistandiki öktichi küchler asasiy qanunning 41 - maddisi boyiche, prézidént waqti 7 yil bolghanliqi üchün, bu waqit toshushning aldidiki dékabirda ötküzüshni telep qildi. Nursultan nazarbayéw 1999 -yili yaniwarda textke chiqqan bolup, bundaq bolghanda saylam bu yil dékabirda ötküzülüshi kérek. Emma nazarbayéf hökümiti bolsa, 94 - maddigha asasen, prézidént waqti axirlashqandin kéyinki dékabirda yeni 2006 - yilida saylam ötküzüshni tekitligen.

Qazaqistandiki asasliq öktichi heriketning rehbiri bolghan amirjan kosanof, nazarbayéf hökümitining öktchilerning déginidek qilishining, mesilini chüshen'genliktin emes, belki qorqqanliqidin mushundaq qilghanliqini bildürüp, "hökümet öktichi küchlerning 2006 - yili saylam ötküzüshke qet'iy qoshulmaydighanliqini tonup yetken" dédi.

Nursultan nazarbayéf, qazaqistan jumhuriyiti sowét ittipaqidin bölünüp chiqqandin buyan prézidéntliq wezipisini ötewatqan bolup, u téxi yéqinda, bu yilmu özini yene prézidéntliqqa körsitidighanliqini jakarlighan.

Qazaqistandiki öktichi küchlerning nazarbayéfqa bolghan naraziliqi künsayin éshiwatqan bolup, bolupmu sabiq sowét ittipaqi jumhuriyetliridin bolghan gruziye, ukra'iniye we qirghizistanlarda yüz bergen öktichi inqilablarning arqa-arqidin ghelibe qilishi, ulargha téximu chong medet bolmaqta. (Peride)