Қирғизистандики өктичиләр қирғизистан һөкүмитини агаһландурди

Қирғизистандики өктичиләр дүшәнбә күни һөкүмәт даирилирини агаһландуруп, әгәр киләр йили қазақистанда өткүзилидиған парламент вә президент сайлимида сахтилиқ әһваллири көрүлсә, украинийидикигә охшаш кәң көләмлик намайиш өткүзидиғанлиқини билдүрди.

Америка бирләшмә ахбарат агентлиқиниң билдүришичә, қирғизистандики өктичи йеңи йөлүнүш тәшкилатиниң рәһбири муратбик иманәлийеф әгәр киләр йили 2 - айда өткүзилидиған парламент сайлимида сахтилиқ әһваллири көрүлсә, өз тәшкилатиниң намайиш өткүзүшни қоллайдиғанлиқини билдүргән. Қирғизистан хәлқ һәрикити тәшкилатиниң дерикториму муратбик имамәлийефниң мәйданини қоллайдиғанлиқини билдүргән.

Буниң алдида, қирғизистан президенти әсқәр ақайеф киләр йили җәмийәттә һәр хил зиддийәтләрниң күчийиши мумкинликини билдүрүп, " бәзи радикал күчләр қораллиқ вастә арқилиқ һоқоқ игиләшкә урунуши мумкин " дигән. У сөзидә радикал күчләрниң кимләр икәнликини иниқ тилға алмиған болсиму, илгири нурғун қетим өктичи гуруппиларни радикал дәп әйиплигән иди.

Өктичиләр әсқәр ақайефниң бу сөзини террорчилиққа қарши көрәш баһанисидә елип бармақчи болған бастуришлириниң һарписида, өзигә җамаәт пикри топлашқа урунғанлиқиниң ипадиси дәп билдүрмәктә.

Қирғизистан президенти әсқәр ақайеф киләр йили өткүзилидиған парламент вә президент сайламлириниң адил өткүзүлишигә капаләтлик қилидиғанлиқини билдүрсиму, әмма күзәткүчиләр, буниңға гуман билән қаримақта. Чүнки 1991 - йилидин боян қирғизистанда елип берилған сайламларниң һичқайсиси адил вә әркин йосунда елип берилған әмәс.(Арзу)