Qirghizistanning narin oblastidiki puqralar xitay altun qazghuchiliridin narazi boldi

Qirghizistanning, Uyghur élining qeshqer tewesi bilen chégrilinidighan narin oblastining narin rayoni, jérghital yézisining puqraliri qirghizistan aliy kéngishi hem hökümitige erz sunup, özlirining bu yerde pa'aliyet élip bériwatqan xitay altun qazghuchilirigha bolghan naraziliqlirini ipadiligen hemde xitay shirkiti "rétmét"ke nisbeten munasiwetlik charilerni körüshni telep qilghan.

Perghane agéntliqining bu heqtiki uchurlirigha qarighanda, yéza puqralirining erzide bildürülishiche, xitay shirkitining ishchiliri mezkur yézining 40 géktar yaylaq rayonida héchqandaq aldin-ala uqturush qilmastinla altun qézish ishlirini bashliwetken.

Bu ehwal puqralarning naraziliqini qozghighan bolup, narin puqraliri öz hökümitige yazghan bildürüshide, eger mezkur xitay shirkitining aldin ala uqturmastin élip bériwatqan altun qézish ishlirini toxtatmisa, yéza puqraliri bilen xitay ishchiliri arisida toqunush kélip chiqidighanliqini agahlandurghan.

Melumki, tengri taghliri we pamirning qirghizistan narin oblasti we issiq köl oblastigha tewe qisimlirida mol altun zapisi bar bolup, uzundin buyan kanada qatarliq döletlerning shirketliri bu yerdin altun qazmaqta, nöwette, xitay terepning mezkur jaylarda qirghizistan terep bilen sözliship, altun qézish ishliri élip barmaqta.(Ümidwar)