Қирғизлар билән өзбекләр оттурисидики мунасивәт барғансери җиддийләшмәктә

Қирғизистанниң җәнубий районидики қирғизлар билән өзбекләр оттурисидики мунасивәт барғансери җиддийләшмәктә.

Қирғизистанниң ош районидики өзбекләр узундин бери, қирғиз даирилириниң уларға иккинчи дәриҗилик пуқра муамилиси қиливатқанлиқидин шикайәт қилип кәлгән иди. Лекин өткән йилидин бери мүлүк һоқуқи мәсилилири түпәйли, ош райондики өзбек җамаитиниң қирғизистан һөкүмитигә болған наразилиқи техиму күчәйгән.

Ош райондики һөкүмәт даирилириниң қирғизлар, өзбекләрниң йәр-земинлирини тартивалса, уни көрмәсликкә селип, өзбекләр қирғизларниң йәр - земинигә чеқилса, өзбекләргә қарши қаттиқ қоллуқ билән муамилә қилиши, өзбекләрниң қаттиқ ғәзипини қозғиған.

Хәвәрләргә қариғанда, бу йил январ ейида ош районида қадирҗан батуроф исимлик бир өзбек сиясийони вә карханчисиниң йетәкчиликидә вәтән һәрикитиниң қурулғанлиқи, қирғиз милләтчилириниң наразилиқини қозғиған. Қирғиз милләтчилири, әзалири асасән өзбекләрдин тәшкил тапқан вәтән һәрикитини қирғизистанниң җәнубий районини өзбекистанға қошушни мәқсәт қилған бир тәшкилат дәп қаримақта.

Қирғиз даирилири, қирғизистандики тәшкилатлар ишлитидиған тил вә йезиқниң икки тилда йәни қирғиз яки рус тилида болуши керәкликини илгири сүрүп, һазирғичә вәтән һәрикитини рәсмий әнгә елишни рәт қилмақта . Батуруф, вәтән кәлимисиниң пәқәт өзбек тилидила әмәс, уйғур, курд вә таҗик тиллиридиму ана юртни ипадиләйдиғанлиқини тәкитләп, бу , вәтән һәрикитиниң өзбекләргә әмәс, қирғизистандики барлиқ аз санлиқ милләтләргә вәкиллик қилидиған бир һәрикәт икәнликиниң бир испати дәп, көрсәткән.

Сиясий мулаһизичиләр, 1990‏- йили қирғизистанниң ош районида қанлиқ етник тоқунушлар йүз бәргәнликини әскәртип, районда қирғизлар вә өзбекләр оттурисида күнсери җиддийлишиватқан вәзийәтниң йәнә бир тоқунуш кәлтүрүп чиқиришидин әндишә қилмақта. (Әқидә)