Qulupning qirghizistanni rusiyige qétish teklipi merkizi asiyaliqlarning inkasini qozghidi

Yéqinda qazaqistan prézidénti nursultan nazarbayéf merkizi asiya döletliri ittipaqini qurup, ortaq güllinish teklipini bergen idi. Mana emdi , uning eksiche qirghizistan öktichi rehberliridin biri, sabiq bash ministir félikis qulop, qirghizistanni rusiyige konfédératsiye shekli bilen qoshush teklipini otturigha qoyghandin kéyin, bu heqte merkiziy asiya ziyaliylirida inkaslar qozghaldi.

Mutexessislerning qarishiche, heqiqeten hazir qirghizistanda yüz bériwatqan éghir iqtisadiy qiyinchiliq tüpeylidin ahalilarning xéli köp qisimi bu pikirni qollishi mumkin, lékin nursultan nazarbayéfning merkiziy asiya döletliri ittipaqi qirghizistan xelqighe köprek menpe'et élip kélish éhtimalliqi zor .

Özbékistanliq siyasiyon ulughbek abdusalamowning qarishiche, merkiziy asiya jumhuriyetlirining rusiye bilen birlishishi bilen merkiziy asiya döletliri ittipaqi dégen birlik astigha uyushishning arisida zor perq mewjut. Rusiye bilen konfédératsiye bolush dégenlik rusiyige siyasiy ,meniwi, iqtisadiy we bashqa jehetlerdin qaram bolush dégenliktur, merkizi asiya ittipaqi bolsa, özara barawerlik asasida qurulushi mumkin .

Qulning bu qararigha nisbeten uning bilen bir septe turup, prézidént baqiyéfqa qarshi chiqqan bir qisim öktichilermu qarshi turghan . Sabiq parlamént bashliqi ömürbek tékebayéf buningdin narazi bolup, rusiyining özi teklip bermigen ehwal astida otturigha qoyulghan mezkur idiyining namuwapiq ikenlikini körsetken.

Amérikida turushluq ismini ashkarilashni xalimighan bir qirghizistanliq féniks qulupning mezkur idiyisi téxi emdila dunyagha kelgen qirghiz dölitining musteqilliqini qaytidin yoqitishtin bashqa nerse emes, uning ornigha qirghizistan merkizi asiya döletliri ittipaqigha kirishi we dölette muqim , yaxshi iqtisadiy siyaset yürgüzüshi lazim deydu.(Ümidwar)