Қирғизистанда парламент сайлими өткүзүлди


2007-12-16
Share

Қирғизистан җумһурийити 16- декабир күни парламент сайлими өткүзди. Пүтүн мәмликәт бойичә бирдәк беләт ташлаш билән өткүзүлгән бу сайламға 12 партийә өз намзатлирини қатнаштурған болуп, улар қирғизистан парламентиниң 90 кишилик орнини талишиду. 2 Милйон 700 миңдин артуқ адәмниң беләт ташлиши пәрәз қилинған болсиму, бирақ йәкшәнбә күни мәркизий сайлам комитети кәч саәт 8 ғичә болған арилиқта беләт ташлиғучиларниң омумий саниниң %61 ниң сайламға қатнашқанлиқини мәлум қилған.

Қирғизистанниң "қабар" агентлиқиниң хәвиридин қариғанда, сайламни хәлқаралиқ тәшкилатлардин явропа бихәтәрлик вә һәмкарлиқ тәшкилати, мустәқил дөләтләр һәмдостлуқи һәм шаңхәй һәмкарлиқ тәшкилатиниң 600 дин артуқ көзәткүчиси көзәткән. Қирғизистан өзи болса 3000 дин артуқ көзәткүчи аҗритип, пүтүн сайламниң омумий әһвалини көзитип турған.

Һазирчә, қайси партийиниң ғәлибә қилиши ениқ әмәс, лекин көпинчә көзәткүчиләр президент қурманбек бақийефниң" ақ җол" партийисиниң ғәлибә қилиш еһтималлиқиниң зорлуқини билдүрүшмәктә. Бирақ, өктичиләр арисида бақийефниң партийисиниң сайлам қануни вә өлчәмлиригә хилаплиқ қилидиғанлиқини алдин ала тәнқид қилишқан.

Бу йилниң бешида қирғизистанда кәң көләмлик өктичиләр намайиши болуп, өктичиләр бақийефни мустәбитлик билән әйиблигән һәтта униң истипа беришини тәләп қилған иди. Бу йил 10- айда болса, бақийеф парламенти тарқитип, йеңи асасий қанун бойичә сайлам өткүзүлидиғанлиқини җакарлиған иди.

Хәвәрләрдин қариғанда, бу қетим аз санлиқ милләтләрниңму өз вәкилини сайлам арқилиқ парламентқа киргүзүш салаһийити берилгән болуп, уйғур, өзбек қатарлиқ милләтләрдин болған намзатлар сайламға чүшкән, әмма һазирчә униң техи нәтиҗиси йоқ. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт