Qirghizistanda parlamént saylimi ötküzüldi


2007-12-16
Share

Qirghizistan jumhuriyiti 16- dékabir küni parlamént saylimi ötküzdi. Pütün memliket boyiche birdek bélet tashlash bilen ötküzülgen bu saylamgha 12 partiye öz namzatlirini qatnashturghan bolup, ular qirghizistan parlaméntining 90 kishilik ornini talishidu. 2 Milyon 700 mingdin artuq ademning bélet tashlishi perez qilin'ghan bolsimu, biraq yekshenbe küni merkiziy saylam komitéti kech sa'et 8 ghiche bolghan ariliqta bélet tashlighuchilarning omumiy sanining %61 ning saylamgha qatnashqanliqini melum qilghan.

Qirghizistanning "qabar" agéntliqining xewiridin qarighanda, saylamni xelq'araliq teshkilatlardin yawropa bixeterlik we hemkarliq teshkilati, musteqil döletler hemdostluqi hem shangxey hemkarliq teshkilatining 600 din artuq közetküchisi közetken. Qirghizistan özi bolsa 3000 din artuq közetküchi ajritip, pütün saylamning omumiy ehwalini közitip turghan.

Hazirche, qaysi partiyining ghelibe qilishi éniq emes, lékin köpinche közetküchiler prézidént qurmanbék baqiyéfning" aq jol" partiyisining ghelibe qilish éhtimalliqining zorluqini bildürüshmekte. Biraq, öktichiler arisida baqiyéfning partiyisining saylam qanuni we ölchemlirige xilapliq qilidighanliqini aldin ala tenqid qilishqan.

Bu yilning béshida qirghizistanda keng kölemlik öktichiler namayishi bolup, öktichiler baqiyéfni mustebitlik bilen eyibligen hetta uning istipa bérishini telep qilghan idi. Bu yil 10- ayda bolsa, baqiyéf parlaménti tarqitip, yéngi asasiy qanun boyiche saylam ötküzülidighanliqini jakarlighan idi.

Xewerlerdin qarighanda, bu qétim az sanliq milletlerningmu öz wekilini saylam arqiliq parlaméntqa kirgüzüsh salahiyiti bérilgen bolup, Uyghur, özbék qatarliq milletlerdin bolghan namzatlar saylamgha chüshken, emma hazirche uning téxi netijisi yoq. (Ümidwar)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet