Béshkektiki bulang- talangda on nechche Uyghur yarilandi

Xitayning béshkekte turushluq bash elchixanisining yekshenbe küni bildürüshiche, qirghizistandiki " siyasiy özgirish" tin kéyin, béshkek shehiride yüz bergen bulang- talang qilish weqeliride Uyghur élidin barghan on nechche Uyghur tijaretchi yarilandi. Ularning ichidiki töti doxturxanigha élip kétilgen bolup, ikkisining ehwali alahide éghir iken.

Xitay metbu'atlirining bildürüshiche, bu Uyghur tijaretchiliri asasliqi béshkektiki medine soda merkizide ötken peyshenbe küni yüz bergen bulang - talangda yarilan'ghan. Xitay elchixanisi yarilan'ghan bu Uyghur tijaretchilirini qandaq orunlashturidighanliqini bildürmidi. Biraq, barliq xitay puqralirini yalghuz sirtqa chiqmasliqqa, bixeterlikke diqqet qilishqa chaqirdi.

Xitay elchixanisining bildürüshiche, ular nöwette xitaygha qaytishni iltimas qilghan bir qisim puqralirini qayturup kélish üchün, mexsus ayropilan orunlashturushqa heriket qiliwatqan iken.

Xitay hökümitining melumatlirigha qarighanda, qirghizistanda xitayning 10 mingdek puqrasi bar bolup, buning ichide ikki mingdeki Uyghurlardin ibaret iken.

24 - Mart küni qirghizistanda hökümet özgirishi yüz bérip, hakimiyet öktichilerning qoligha ötkendin kiyin, béshkekte bir nechche kündin boyan dawamlashqan bulang- talang weqeliride, Uyghur sodigerlirimu bulang - talang qilinish obéktigha aylinip, ularning nechche milyon dollarliq mal - mülki ziyan'gha uchrighanliqi bildürülmekte. (Arzu)