Qirghizistandiki Uyghur sodigerliri igisiz qiliwatidu

Ötken hepte qirghizistanda prézidént esqer aqayof hakimiyitining aghdurulishi jeryanida béshkekte yüz bergen bulang- talangda ziyankeshlikke uchrighan sodigerler asta- asta ishlirini qaytidin bashlash üchün teyyarliq köriwatidu. Lékin igisiz qalghan Uyghur sodigerliri téxi néme qilarini bilmeywatidu.

Fransiye agéntliqining xewer qilishiche, esqer aqayof hakimiyiti 27 - mart küni gumran bolghandin kéyin, qirghizistanning waqitliq prézidénti qurmanbik baqiyéf, qirghizistandiki weqelerdin endishilen'gen qirghizistanda yashawatqan rus we özbeklerning bixeterliki we heq- hoquqlirigha kapaletlik qilidighanliqini bildürüp, ularni xatir jem qilishqa tirishti. Shunga qirghizistandiki sodigerler bulang- talang jeryanida chéqiwitilgen dukanlirining derizilirini qaytidin saldurup, tijaritini qaytidin bashlash üchün teyyarliq körmekte. Emma qirghizistanda tijaret qiliwatqan Uyghurlar bundaq kapaletke ige bolmighanliqi üchün néme qélish toghrisida téxi bir qarar bermigen.

Fransiye agéntliqining xewer qilishiche, hetta béshkekte yüz bergen bulang - talang jeryanida, asasen Uyghur sodigerliri jaylashqan medine bazirigha kelgen nechche ming qirghiz yash, "qirghizlar bu terpke ötünglar, biz Uyghurlarni urghili kelduq, Uyghurlar wetinige qaytip ketsun" dep waqirighan.

Medine baziridiki Uyghur sodigerliri, dukanlirini qirghiz bulangchiliridin qoghdashqa tirishqan, lékin bulangchilarning sani nahayiti köp bolghanliqtin, Uyghur sodigerliri ajiz kélip qalghan.

Bu arida, qirghizistandiki weqelerdin kéyin xitay hökümiti teripidin torghat chégra ponkitidiki qattiq bixeterlik tedbirliri dawamlashmaqta. Emma fransiye agéntliqining xewer qilishiche, chégra ponkiti taqalmighan bolup, kirish -chiqishqa ruxset qilinmaqta. (Qanat)