Xitay, yéngi qirghizistan hökümitining dawamliq "térrorchi" largha zerbe bérishte hemkarlishishini ümid qilidu

Xitay hökümiti seyshenbe küni qirghizistan yéngi hökümitining " térrorchiliqqa qarshi turush" ta béyjing bilen hemkarlishishini ümid qilidighanliqini bildürdi. Xitay hökümiti da'im Uyghur musteqilchilirining pa'aliyetlirini "térrorchiliq" bilen eyibleydu.

Xitay tashqi ishlar ministirliqining bayanatchisi lyu jenchaw bayanatida "biz qirghizistan bilen bolghan xoshnidarchiliq munasiwitimizning dexli- teruzgha uchrimasliqini, shundaqla térrorchiliqqa qarshi hemkarliqimizning dawamlishishini ümid qilimiz", dédi.

Fransiye axbarat agéntliqining bildürishiche, qirghizistanning texttin chüshken prézidénti esqer aqayéf xitay hökümitining Uyghur musteqilchilirini basturushidiki küchlük qollighuchilirining biri idi. Xitay hökümiti uning hakimiyitidin paydilinip, qirghizistan'gha yoshurun'ghan Uyghur pa'aliyetchilirini tutqun qilghan.

Bir qisim analizchilar, yéngi hökümetning qirghizistanning tashqi siyasitide özgirish yasimasliqi mumkinlikini otturigha qoymaqta. Biraq, qirghizistanning yéngi rehberliri téxi xitay bilen munasiwitidiki meydanini ochuq bildürmidi. Nöwette hoquq igiligen qirghizistan öktichilirining rehberliri ilgiri esqer aqayéf hökümitining xitay hökümiti bilen birliship, Uyghur musteqilchilirini basturishini tenqid qilghan idi. (Arzu)