Қирғизистан парламент сайлиминиң һарписида вәзийәт җиддиләшмәктә


2005-02-24
Share

Йәкшәнбә күни өткүзүлидиған қирғизистан парламент сайлиминиң һарписида, қирғизистан дөләтлик телеграф идариси мустәқил һалда хәвәр беридиған "азадлиқ радиоси" қирғиз бөлүминиң көп қисим программилириниң тарқитилишини тохтатти.

Ройтирс агентлиқиниң хәвиригә қариғанда, қирғизистан телеграф идариси, "азадлиқ радиоси" әң көп ишлитидиған частотиниң ишлитилишини 3 - айниң 10 - күнигичә тохтатқан. Америкиниң мәблиғи билән қурулған мәзкур радио истансиси қирғизистандики бирдин-бир мустәқил ахбарат оргини һесаблинатти.

Хәвәргә қариғанда, қирғизистанниң бир қанчә йәрлиридә, йәрлик кандидатларниң парламент сайлимиға қатнишиши чәкләнгәнлики үчүн намайишлар көтүрүлгән. Нарин областиниң қошқар кәнтидики 3000 дәк намайишчи үч күндин буян хитайға тутушидиған ташйолни тосуп, йәрлик кандидат әзаси ақулбек җапарофниң кандидатлиқ салаһийитиниң бикар қилинғанлиқиға наразилиқ билдүргән. Әмма қирғизистанниң дөләт мәтбуатлири бу намайишлар һәққидә хәвәр бәрмигән.

Хәвәрдин мәлум болушичә, қирғизистандики өктичи гезит-жорналларни басидиған басма завутлардиму сәйшәнбә күнидин башлап ток тохтап қалған. Басма завути чаршәнбә күни америка әлчиханисиниң гениратурлирини иҗаригә елип, хизмитини давамлаштурушқа мәҗбур болған. Гезитхана даирилири қирғизистан һөкүмитиниң ток тохташ ишида қоли барлиқини билдүрмәктә.

Қирғизистанда йәкшәнбә күни өткүзилидиған парламент сайлими 30 - өктәбирдики президент сайлимиға йол ечип бериду дәп қаралмақта. Гәрчә қирғизистан президенти әсқәр ақайеф бу йил вәзиписидин чүшидиғанлиқи һәққидә вәдә бәргән болсиму, әмма өктичиләр ақайефниң вәзиписидин айрилиштин бурун, өзигә майил парламентни тәшкил қилишидин әндишә қилмақта. (Арзу)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт