Қирғизистандики асаслиқ өктичи рәһбәр йеңи парламентни қоллиди

Қирғизистандики өктичи рәһбәр филикис кулуф вә қирғизистан мәркизи сайлам комитети қирғизистанда йеңидин сайланған парламентни қоллиди.

Қирғизистандики өктичиләр өткән айда елип берилған парламент сайлимида еғир сахтилиқ қилмишлириниң йүз бәргәнликини әйиплигән вә буниңдин келип чиққан аммиви наразилиқлар сәвәбидин президент әсқәр ақайеф тәхттин чүшкән иди.

Бирақ ройтирс агентлиқиниң хәвиригә қариғанда, қирғизистанниң бихәтәрлик ишлириға мәсол йеңи әмәлдари филикис кулуф, сайлам нәтиҗисигә сәл қараш ички урушни кәлтүрүп чиқириши мумкин дәп агаһландурған вә йеңи парламентниң қанунлуқ икәнликини көрсәткән. Буниңдин сирт, қирғизистан сайлам комитетиму йәкшәнбә күни парламент сайлиминиң нәтиҗисини қоллайдиғанлиқини билдүрди.

Бирақ, алдинқи қарар парламенттики әзалар кона парламентниң һоқуқини сақлап қелиши керәк дәп қаримақта. Өткән пәйшәнбә күни қазақистан алий сот мәһкимиси иккинҗи айда елип берилған парламент сайлиминиң нәтиҗисини инавәтсиз дәп елан қилип, алдинқи қарар парламенттниң қанун бойичә йәнила күчкә игә икәнликини билдүргән иди. Қирғизистан вақитлиқ һөкүмитиниң йеңидин тәйинләнгән президенти қурманбәг бақейфму буни қарши алған иди.

Ройтирс агентлиқиниң билдүрүшичә, қирғизистан вәзийитини контрол қиливатқан вақитлиқ президент вә бихәтәрлик ишлириниң мәсули оттурисидики пикир ихтилабиму еғир болмақта икән. " яврупа бихәтәрлик һәмкарлиқ тәшкилати" ниң қанун мутәхәссислири нөвәттә йеңи вә кона парламент арисидики тоқунушни һәл қилиш үчүн тиришмақта.

Буниң алдида, қирғизистанниң вақитлиқ президенти қурманбәк бақейф 26 - июн күни президент сайлими өткүзидиғанлиқини җакарлиған. Бу арида, русийә президенти виладемир путин, қирғизистандики йеңи рәһбәрләрни вәзийәтниң начарлишишиниң алдини елишқа чақирған вә өзиниң қирғизистан вақитлиқ һөкүмитиниң рәһбири қурманбәк ақийеф билән һәмкарлишишни халайдиғанлиқини билдүргән. Хәвәрләргә қариғанда, қирғизистан президенти әсқәр ақайеф нөвәттә русийигә қечип беривалған икән. (Арзу)