Qirghizistan, parlamént ezasining türmide étip öltürülüsh weqesini tekshürmekte

Qirghizistan prézidénti qurmanbék baqiyéf, béshkek etrapidiki bir türmini tertipke sélish üchün barghan parlamént ezasi tinchbék axmatbayéf we ikki yardemchisining mehbuslar teripidin öltürülush weqesi üstidin tekshürüsh élip bérishni buyridi.

Qirghizistan hökümitining bildürüshiche, axmatbayéf we uning ikki yardemchisi peyshenbe küni béshkek etrapidiki 31 - numurluq türmige barghinida görüge élinip étip öltürülgen. Axmatbayéf qirghizistan parlaméntining bixeterlik we siyaset komitétining re'isi idi. Bezi melumatlarda, axmatbayéfning yénidiki ademlerning aldi bilen mehbuslargha oq chiqarghanliqi éytilmaqta. Qirghizistan da'iriliri bixeterlikni chiqish qilip, türmidiki barliq xadimlarni türmidin ketküziwetken. Nöwette mezkur türmini qirghizistan bixeterlik qisimliri qorshawgha élip küzetmekte.

Roytirs agéntliqining xewirige qarighanda, qirghizistanda 18 mingdin artuq mehbus bolup, türmining shara'itliri intayin nachar iken. Axmatbayéf bu türmige naraziliqlarni bésiqturup tertipke sélish üchün barghan iken. Qirghizistan bash ministiri kuluf peyshenbe küni kechte türmidikiler bilen söhbetliship, ularni bir qisim qorallar we ölgenlerning jesitini tapshurushqa qayil qilghan.

Qirghizistan ediliye ministirliqi türme bashqurush da'irilirining bayanatchisi sérgiy sidorof nöwette weziyetning intayin jiddiy bolsimu, kontrol astigha élin'ghanliqini bildürdi. (Arzu)