Қирғизистанда намайиш йүз бәрди


2005.10.23
Share on WhatsApp
Share on WhatsApp

Қирғизистанниң дөләтлик "қабар" агентлиқиниң учуридин қариғанда, җүмә күнидин етибарән қирғизистанниң пайтәхти бишкәк шәһиридики һөкүмәт вә парламент бинаси алдида бир қанчә йүз киши наразилиқ намайиши өткүзүп, баш министир феликис қулопниң вәзиписидин истипа беришини тәләп қилған.

20-Өктәбир күни бишкәк йенидики 31-номурлуқ түрмигә тәкшүрүшкә барған парламент әзаси тиничбек ахматабайев қатарлиқ тот киши өлтүрүлгәндин кейин баш министир феликис қулоп, бу түрмигә кирип, топилаң көтүргән җинайәтчиләр билән сөһбәтлишип, вәзийәтни муқимлаштурған иди.

Бу қетим наразилиқ намайиши өткүзгәнләр парламент әзаси тиничбек ахматбайевниң туғқанлири вә тәрәпдарлири болуп, улар қулупни ахматбайевни өлтүрүш билән мунасивәтлик дәп қариған.

Баш министир феликис қулоп, бу әйибләшни рәт қилип, өзиниң бу адәмләрниң тәлипигә бинаән истипаға чиқмайдиғанлиқини, пәқәт рәсми қануний асас вә демократик тәртип бойичә истипа беришкә тәйяр икәнликини билдүргән. У йәнә, өзиниң түрмидә өлгүчи тиничбек ахматбайевниң туғқанлири билән көрүшүшкә тәйяр икәнликини билдүргән.

Тәһлилләргә қариғанда һазир қирғизистанда қара қоллар гуруһи билән һакимийәт арисидики күрәш өткүрләшкән болуп, тәшкиллик җинайәтчиликкә қарши туруп, җәмийәттә хатирҗәмлик яритиш хәлқниң җиддий телип болуп қалмақта. (Үмидвар)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.