Qirghizistan amérikigha manas hawa armiye bazisini taqash toghrisida tehdit saldi

Qirghizistan bash ministiri filiks qulof seyshenbe küni qirghizistan hökümiti amérikidin manas hawa armiye bazisi üchün telep qilghan ijare heqqini alalmisa, hawa armiye bazisini taqash éhtimalliqi barliqini bildürdi. Amérika bilen qirghizistan manas hawa armiye bazisining yilliq ijra heqqi toghrisida talash tartish qilishmaqta.

Filiks qulof, mezkur baza " térrorchiliqqa qarshi urush dawam qilghan jeryan ichide mewjut bolup tursa we afghanistan weziyiti ongshalghiche mewjut bolup tursa bolidu" dep tekitligen. Bash ministir qulof yuqiriqi sözlerni amérikining bir wekiller ömiki qirghizistan hökümiti bilen manas hawa armiye bazisining ijare heqqini östürüsh mesilisi boyiche söhbet élip bériliwatqan bir chaghda élan qildi. Prézidént qurmanbeg baqiyéf eger amérika qirghizistan bilen peyshenbe kün'giche manas hawa armiye bazisining ijare heqqini östürüp bérish mesiliside kélishim hasil qilmisa, amérika qisimlirining qirghizistandin chiqip kétishni telep qilimiz, dep tehdit salghan.

Qirghizistan 2001 - yili 11 - séntebir weqesidin kéyin , amérika qisimlirini hawa armiye bazisi bilen teminleshke bashlighan. Baqiyéf hökümiti amérikining manas hawa armiye bazisi üchün qirghizistan'gha yilda 200 milyon dollar ijare heqqi tölishini telep qilmaqta. Lékin birleshme axbarat agéntliqining eskertishiche, amérika terep ijare heqqini köpeytishni xalisimu, lékin qirghizistan telep qilghan ijare sommisini qobul qilishni ret qilghan.

Özbékistan hökümiti ötken yili amérikining xan'abad hawa armiye bazisidiki qisimlirini élip chiqip kétishni telep qilghandin kéyin, manas hawa armiye bazisining ehmiyiti téximu kücheydi. Qirghizistan terepning eskertishiche , ikki terep peyshenbe kün'giche kélishm hasil qilishi mumkin. (Erkin)