Қирғизистанда бәш нәпәр ислам милитани сақчилар билән болған тоқунушта өлтүрүлди

Бәш нәпәр ислам җәңчиси җүмә күни җәнубий қирғизистанниң җалалабад шәһиридә қирғизистан аманлиқ күчлири тәрипидин өлтүрүлди. Қирғизистан ички ишлар министирлиқи баянатчисиниң әскәртишичә, қирғиз аманлиқ күчлири җүмә күни җалалабад шәһиридә бир өйгә һуҗум қилип, өйдики 5 нәпәр ислам җәңчисини өлтүргән.

Қирғизистан ички ишлар министирлиқиниң баянатчиси нурдин җангарайип, дөләт бихәтәрлик идариси хадимлири вә сақчиларниң җалалабадтики бир өйгә йошурунивалған өзбекистан ислам һәрикити тәшкилатиниң диний әсәбий күчлирини қоршивелип тәслим болушқа чақирғанлиқини билдүрди. У, франсийә ахбарат агентлиқиға елан қилған баянатида " исламчи милитанлар чақириқимизға оқ етип җавап бәрди" дәйду. Униң әскәртишичә, өзбекистан ислам һәрикитиниң бу 5 нәпәр җәңчиси сақчилар билән болған тоқунуш җәрянида өлтүрүлгән.

Қирғизистан даирилири бу кишиләр өткән дүшәнбә күни бир қирғиз сақчиниң өлтүрүлүшини вә 3 кишиниң ярилинишини кәлтүрүп чиқарған етишиш вәқәси билән алақидар, дәп қаримақта. Бу йил 5 - айда аз дегәндә 4 нәпәр қирғиз вә таҗикистан чегра мудапиә хадими қораллиқ унсүрлар тәрипидин өлтүрүлгән. Өзбекистан ислам һәрикити талибан дәвридә райондики актип қораллиқ тәшкилатларниң бири иди. Лекин бу тәшкилат 11 - синтәбир вәқәсидин кейин америкиниң афғанистан һәрикити җәрянида еғир зәрбигә учриған. (Әркин)