Қирғиз өктичилири һөкүмитиниң тазилаш һәрикитини әйиблиди

Қирғизистандики сиясий өктичиләр вә кишилик һоқуқ тәшкилатлири қирғизистан һөкүмитиниң, қирғизистанниң җәнубий районида радикал гуруппиларға қарита елип бериватқан тазилаш һәрикитини тәнқид қилди.

Асаба партийисиниң рәиси вә сабиқ қирғизистанниң баш тәптиши әзимбек бекнәзәроф пәйшәнбә күни қирғизистан бехәтәрлик органлирини җалалабад вә ош районлирида елип барған һәрикәтлиридә, кишиләрни сәвәпсиз тутуп қанунларни дәпсәндә қилған дәп әйиблиди. Бекнәзәрофниң ейтишичә, 6 ‏- ағуст күни өлтүрүлгән атақлиқ имам муһәммәт рәфиқ камалоф қатарлиқ нурғун бигуна кишиләр қирғиз бихәтәрлик қисимлириниң районда елип барған һәрикитиниң қурбани болған.

Қирғизистан кишилик һоқуқ қоғдиғучиси турсунбай бақироғли болса, қирғизистан бихәтәрлик қисимлириниң ош вә җалалабад районлирида елип барған һәрикәтлиридә, гумандарларни тутуш үчүн уларниң өйлиригә алдинала чәкләнгән тәшвиқат материяллири вә қорал йошуруп қоюп, андин уларни тутуп қамиғанлиқини илгири сүрмәктә.

Бек нәзәроф вә бақир оғли пәйшәнбә күни бекшәктә бәргән баянатида, қирғизистан бихәтәрлик қисимлириниң бу тазилаш һәрикитини өзбекистан даирилири билән һәмкарлашқан һалда елип барғанлиқини баян қилди. Улар шундақла аһалисиниң мутләқ көп қисми өзбекләрдин тәшкил тапқан бу районда елип берилған тазилаш һәрикити, етник тоқунушларни кәлтүрүп чиқириши мумкин дәп агаһландурди.

Әмма қирғизистан миллий бихәтәрлик кеңишиниң алий дәриҗилик хадими ойталбек османоф бек нәзәроф вә бақир оғлиниң әйибләшлирини рәт қилип, қирғизистан вә өзбекистан бихәтәрлик даирилириниң пәқәт учур алмаштурғанлиқини билдүрди. (Қанат)