Қирғизистан һөкүмити, ош районидики исламчиларни тәслим болушқа чақирди


2006.08.21

Қирғизистан миллий бихәтәрлик кеңиши, қирғизистанниң ош районидики һизбутәһрир вә түркистан исламий һәрикити дәп аталған өзбекистан ислами һәрикити әзалирини 1‏- сентәбир күнигичә қораллирини ташлап тәслим болушқа чақирди.

Қирғизистан мәтбуатиниң хәвәр қилишичә, қирғизистан миллий бихәтәрлик кеңиши тәрипидин бу мунасивәт билән елан қилинған баянатда, 1‏- сентәбир күнигичә қораллрини тапшуруп тәслим болмиған милитанларниң қаттиқ җазалинидиғанлиқи әскәртилгән.

Русийиниң интәр факс агентлиқи 19‏- авғуст күни, қирғизистан бихәтәрлик кеңишиниң, қирғизистанниң ош районида йошурунған милитантлар һәққидә һөкүмәткә хәвәр бәргәнларгә100‏- миң сом йәни икки миң бәш йүз америка доллири сөйүнчә беридиғанлиқини җакарлиғанлиқини хәвәр қилған иди.

Қирғизистан даирилири бир нәччә һәптә бурун қирғизистанниң ош вә җалалабад районидики исламий гуруппиларниң паалийәтлирини бастуруш үчүн бу районда кәң көләмлик бир тазилаш һәрикити башлиған. Әмма қирғизистандики сиясий өктичиләр вә кишилик һоқуқ тәшкилатлири, қирғиз бихәтәрлик қисимлирини өзбекистан бихәтәрлик қисимлири билән бирликтә елип барған бу тазилаш һәрикити җәрянида бигунаһ кишиләрни исламий һәрикити әзаси дәп тутуп, уруп уларниң кишилик һоқуқни дәпсәндә қиливатиду, дәп қаттиқ әйблимәктә. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.