Qirghizistan da'iriliri musulman diniy zatlarning pa'aliyitini kontrol qilishni qarar qildi

Qirghizistan dölet bixeterlik organliri, qirghizistandiki musulman diniy zatlarning pa'aliyetlirini qattiq kontrol qilishni qarar qildi.

Rusiye metbu'atida chiqqan xewerlerge qarighanda, qirghizistan bixeterlik kéngishi, qirghizistandiki musulmanlarning diniy pa'aliyiti üstidiki kontrolliqini kücheytish üchün mexsus bir pilan teyyarlighan. Xewerde éytilishiche, bu pilan'gha asasen, hökümetning bundin kéyin bolupmu qirghizistanning jenubidiki osh, jalal'abad we batkén rayonlirida yashawatqan yaki burun bu rayonda yashighan Uyghur we özbék diniy zatlarning pa'aliyetlirini yéqindin küzitidiken.

Qirghizistan bixeterlik kéngishi teripidin tüzülgen mezkur pilanda yene, qirghizistandiki diniy mekteplerning ders programmiliri, meschitlerde imamlarning sözliri we béridighan wezlirini qattiq kontrol qilish, diniy zatlarning chet'ellik sodigerler bolupmu pakistan, iran, türkiye en'giliye qatarliq döletlerdiki hemde erep döletliridiki sodigerler bilen birliship tijaret qilishni cheklesh, chet'ellerdiki diniy mekteplerde bolupmu, se'udiy erebistan, kuweyt, pakistan we misir qatarliq döletlerde oqighan, 35 yashtin kéchik kishilerning heriketlirini yéqindin közitish qatarliq tedbirler otturigha qoyulghan.

Qirghizistan metbu'atida, qirghizistandiki diniy zatlarning radikal islam teshkilatliri bilen alaqisi barliqi toghrisida xewerler chiqqan idi.

Qirghizistan hökümiti yéqinda, qirghizistanning jenubiy rayonidiki diniy guruppilargha qarshi bir tazilash herikiti élip barghan. Hökümetning bu tazilash herikiti qirghizistandiki kishilik hoquq teshkilatlirining qattiq tenqidige uchrighan bolup, kishilik hoquq teshkilatliri qirghizistan bixeterlik qisimlirini özbékistan bixeterlik qisimliri bilen birlikte élip barghan herikiti jeryanida, bigunah puqralarni xalighiniche tutup, qiynighan dep, eyibligen. Ular hökümetning bu herikiti qirghizistanda étnik bir toqunushni keltürüp chiqishi mumkin dep, agahlandurghan idi. (Eqide)