Qirghizistan prézidénti öktichilerning bezi teleplirini qobul qildi

Qirghizistan prézidénti qurmanbég baqiyéw düshenbe küni öktichi guruhlarning bezi teleplirini qobul qilidighanliqini bildürgen. Düshenbe küni öktichi guruhlar béshkek shehiridiki merkizi chong meydanda élip bériwatqan namayish 5 - künige kirdi.

Birleshme axbarat agéntliqining xewer qilishiche, 10 ming kishilik namayishchilar qoshuni baqiyéwning ishxanisi aldida yighilish ötküzgen shundaqla qirghizistan parlaméntidiki 31 neper öktichi parlamént ezasi baqiyéwning asasi qanun islahat layihisini muwapiqyetlik halda tosap qalghandin kéyin, prézidént baqiyéw öktichilerning bezi teleplirini qobul qilghan.

Öktichi rehberlerning biri azimbég beknezarowning eskertishiche, baqiyéwning islahat layihiside parlamént we hökümetning hoquqi kéngeytilmigen. Lékin öktichi parlamént ezasi ömürbég babanow, namayishning baqiyéw wezipisidin istipa bergüche dawamlishidighanliqini bildürgen.

Namayishchilar, baqiyéwning prézidént hoquqini qisqartish, parlamént we hökümetke téximu chong hoquq bérish toghrisidiki wedisini orundimighanliqini eskertmekte. Xewerlerge qarighanda baqiyéwni prézidént ishxanisi aq öyni qoghdawatqan bezi saqchilar namayishchilar terepke ötup, "xelq bilen qarshilashmaydighanliqini" ipadiligen. Baqiyéw, öktichiler rehberliri bilen körüshüp, ularning teleplirini muzakire qilghan.

Körüshüshtin kéyin öktichi küchler rehbiri almazbék atambayéw, baqiyéwning asasi qanun islahati élip bérish, yéngi hökümet qurush, dölet téléwiziyisini ammiwi qanalgha aylandurush, ichkiri ishlar ministiri osman'ali guronow, bash teptish kambar'ali kon'gantiyéwlarni wezipisidin élip tashlashqa maqul bolghanliqini jakarlidi. (Erkin)