Qirghizistan –rusiye hökümetliri qirghizistan puqralirini kechürüm qilish heqqide söhbet ötküzdi

Qirghizistan milliy uchur agéntliqi "qabar" ning xewer qilishiche, rusiye qirghizistan hökümetler ara komissiyisi 15-dekabir küni rusiyide turiwatqan 500 ming qirghizistanliqning 2007-yili rusiyide qanunluq turup, tirikchilik qilishigha yol qoyush mesilisi boyiche söhbet ötküzüp, deslepki qedemdiki höjjetke qol qoyghan. Höjjetni qirghizistan tereptin bash ministiri félikis qulop imzalighan.

Höjjette körsitilishiche, qirghizistan terep rusiyige resmiy yosunda rusiyide turiwatqan qirghizistan emgekchi köchmenlirini 2007-yilining aldinqi yérimida kechürüm qilish heqqide teklip béridu,

Rusiye sehiye ministirlikining ijtima'iy parawanliq orgini, qirghizistan ijtima'iy emgek ministirliqi we ijtima'iy parawanliq fondi qatarliqlar orunlar rusiyidiki mezkur köchmen emgekchilerning pénsiye summisigha érishish, tizimlitish hem istraxowaniyige eza bolush qatarliq mesililirini hel qilish üstide ishleydu.

Uchurlardin melum bolushiche, qirghizistan ahalisining beshtin biri chet memliketke chiqip ketken bolup, ular til-yéziq we bashqa qolay shara'itlar tüpeylidin asasliqi rusiyige bérip, tirikchilik qilidiken.

Uchurlardin qarighanda, mundaq köchmenlerning sani bir milyon etrapida bolushi mumkin iken. Qirghizistan hökümiti rusiyidin izchil türde bu köchmenlerning qanunluq ishlishi we turushigha yol qoyushni telep qilip kelmekte. Emma, rusiye jem'iyitide köchmenlerge qarshiliq körsitish ehwalliri éghir bolup, ottura asiyaliq, kawkazliq hem xitayliq köchmenlerning da'im rus milletchilirinig zerbisige uchrawatqanliqi melum. (Ümidwar)