Qirghizistan shangxey hemkarliq teshkilatining aliy yighini ötküzüsh teyyarliqi qilmaqta


2007.02.11

Qirghizistanning "qabar " agéntliqining uchuridin melum bolushiche, qirghizistan prézidénti qurmanbék baqiyéw shangxey hemkarliq teshkilati aliy rehberliri yighinning bu yil bishkekte ötküzülüshi munasiwiti bilen qirghizistan puqraliri, hökümet we bishkek sheher rehberlirini bu yighinni kütüwélish üchün teyyarliq xizmetlirini yaxshi ishleshke chaqirdi.

Xewerge qarighanda, 10-fewraldiki shenbilik xalisane emgek küni shangxey hemkarliq teshkilatining ötküzülgüsi yighinigha béghishlighan bolup, qurmanbék baqiyéw " shangxey hemkarliq teshkilatining xelq'araliq abruyluq teshkilat ikenlikini tekitlesh bilen birge barliq sheher ahaliliridin özliri turiwatqan bina we uning etrapini, mehellilerni, memuri organlar hem barliq kochilarni yaxshi tazilap tertipke sélishni telep qilghan.

Baqiyéw yene yéqinda hökümetning bu yighinni kütüwélish üchün mexsus pul ajritip, bu pullarni peqet shu ishlarghila ishlitidighanliqini, ilgirikidek hökümet pullirining emeldarlarning yanchuqigha chüshüp kétishtek qilmishlargha yol qoymaydighanliqini eskertken.

Xewerge qarighanda, bishkek sheherlik hökümet shangxey yighinning échilishidin burun sheher qiyapitida yaxshilash élip bérish üchün qurulushlar we yollar, su qanalliri hem baghchilarni tertipke sélishni pilanlighan.

Shangxey hemkarliq teshkilatining aliy rehberliri yighini bu yil bishkekte échilish qarar qilin'ghan bolup, qurmanbék baqiyéw qirghizistanning shangxey hemkarliq teshkilatining yighini ötküzüshi we uninggha teyyarliq qilishining qirghizistanning iqtisadiy tereqqiyatini ilgiri sürüsh bilen munasiwetlik ikenlikini eskertken.

Shangxey guruhining yighini ötken yili 7-ayda shangxeyde échilghan bolup, mezkur teshkilatning da'irisi barghansiri kéngeymekte. Qirghizistan xitay bilen birlikte sherqiy türkistan namidiki Uyghur siyasiy herikitige birlikte zerbe bérishke pütüshken. Uyghur siyasetchiliri shangxey hemkarliq teshkilatining térrorluq, bölgünchilik we diniy esebiylikke qarshi turush namidiki wezipiliridin birining Uyghurlarning siyasiy heriketlirini yoq qilish ikenlikini bildürüshmekte.(Ümidwar)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.