Qirghizistanda öktichi heriket rehberliri soraq qilinmaqta

Bixeterlik qisimlirini ishqa sélish arqiliq, qirghizistan öktichi herikiti teripidin béshkekde élip bériliwatqan naraziliq namayishini tarqitiwetken qirghizistan da'iriliri, shenbe küni qirghizistan siyasiy öktichilirining rehbiri filiks qolufni soraq qilghan.

Qirghizistan saqchiliri peyshenbe küni qirghizistan öktichilirining 9 kün dawamlashqan naraziliq herikitini tarqitiwetken idi. Namayishchilar prézidént baqyifning wezipisidin istipa bérip, qirghizistanda yéngi prézidént saylimi ötküzüshini telep qilmaqta.

Sabiq qirghizistan bash ministiri we qirghizistan öktichi herikiti birleshme sep ittipaqining rehbiri bolghan filkis qoluf, qirghizistan bixeterlik da'irilirining töt sa'et dawamlashqan soraqliridin kéyin muxbirlargha bergen bayanatida, qirghizistan milliy bixeterlik komitéti xadimlirining uni peyshenbe küni prézidént baqiyifning sariyi etrapida élip bérilghan namayishning shahidi süpitide soraq qilghanliqini bildürdi.

Qoluf hökümet da'iriliri, naraziliq herikitini basturush üchün, namayshchilarni jidel chiqirishqa qutratqan dep eyiblimekte.

Peyshenbe küni prézidént sariyi etrapida namayishchilar bilen qirghizistan saqchi qisimliri otturisida yüz bergen toqunushlarda 8 saqchi xadimi we 7 namayishchi yarilan'ghan. Qirghizistan bixeterlik da'iriliri bu toqunushlardin kéyin, 34 neper öktichi herikiti pa'aliyi'etchisini tutqan hemde siyasiy öktichilerning rehberlirini soraq qilmaqta.

Xewrlerge qarighanda, peyshenbe künidiki toqunushlardin kéyin, naraziliq herikitini dawamlashturush yaki toxtitish mesiliside qirghizistan öktichi herikiti otturisida ixtilap chiqqan. Islahat üchün heriket öktichi guruppisining rehbiri qubatbek bayboluf, jüme küni prézidént baqyifqa qarshi élip bériliwatqan namayishtin chikinidighanliqini jakarlap, prézidént baqiyifning istipasini telep qilshitinmu wazkechkenlikini bildürdi. (Qanat)