Qirghizistanda qolgha élin'ghan siyasiy öktichi heriket rehberliri qoyup bérildi

Qirghizistan da'iriliri shenbe küni, qirghizistanning paytexti béshkekte hökümetke qarshi élip bérilghan naraziliq namayishliridin kéyin, qolgha élin'ghan qirghizistan siyasiy öktichi herikitining üch rehbirining qoyup bérilgenlikini bildürdi.

Qirghizistan bash teptishi elmurza satwaldiyifning bildürüshiche, qirghizistanning sabiq ichki ishlar minstiri ömerbék suwanaliyif qatarliq üch öktichi rehbiri 4 kün tutup turulghandin kéyin jüme küni axshimi qoyup bérilgen. Emma ular üstidiki tekshürüsh téxi axirlashmighanliqi üchün, ularning qirghizistandin ayirilishigha ruxset bérilmeydiken.

Qirghizistan siyasiy öktichi herikitining rehberliri, qirghiz bixeterlik qisimliri prézidént baqiyifning sariyi aldida ötküzülgen namayishni yash aqquzidighan we awaz chiqridighan bomilar ishlitish arqiliq tarqitiwetkendin kéyin, qirghiz saqchi da'iriliri teripidin xelqni topilang chiqirishqa küshkürtken dégen jinayet bilen tutulghan idi.

Qirghizistanda 2005‏- yili esqer aqayif hakimiyitining bir xelq qozghilingi bilen gumran bolushidin kéyin, bashlighan siyasiy krizis hazirghiche dawamlashmaqta.

Qirghizistandiki siyasiy öktichiler, esqer aqyafdin kéyin hakimiyet béshigha kelgen baqiyifni, prézidént saylimida bergen wedilirige emel qilmighan we chirikilikning aldini almighan dep eyiblimekte. (Qanat)