Қирғизистан "тулип" инқилабиниң бир йиллиқини хатирилиди


2006.03.24

Қирғизистан җүмә күни президент ақайефниң ағдурулушини вә өктичиләрниң һакимийәт бешиға чиқишини кәлтүрүп чиқарған " көркүм гүл" инқилабиниң бир йиллиқини бешкәк мәйданида һәрбий паратлар билән хатирилиди.

2005 ‏- Йили 24 ‏- март күни партлиған "көркүм гүл" инқилабида президент ақайеф русийигә қечип кәткәндин кейин, өктичиләр рәһбири қурманбег бақийеф муваққәт президент болуп һакимийәтни өткүзүвалған вә шу йили 7 - айдики президент сайлимида ғәлибә қилған иди.

У, җүмә күни алато мәйданида өткүзүлгән хатириләш мурасимида, мәтбуат әркинлики вә аммивий җәмийәтләрниң ролини күчәйтиш қатарлиқ мәзмунлар бойичә сиясий ислаһат елип беришқа вәдә бәрди. Бақийеф, " өткән бир йилда елип берилған пүтүн ишлар муқәддимиси 2005 - йили 24 - март күни башланған инқилаби өзгиришниң биринчи қәдими,' дәйду. Лекин у, " һәммә немини бир саәт ичидә өзгәрткили болмайду ” дәп көрсәтти.

"Көркүм гүл" инқилабидин кейин қирғизистан муһитиниң техиму демократийилишишкә башлиғанлиқини тәкитлигән бақийеф, мәйдандики хәлқ аммисиға " қирғизистан диктатурлуқ, дөләт хиянәтчилики вә адаләтсизликкә һәргиз қайтип бармайдиған пәрқлик дөләткә айланди" дәйду.

Шу күни америкиниң қирғизистанда турушлуқ баш әлчиси марий йованович баянат елан қилип, бақийефниң ислаһат вәдисигә әмәл қилишини вә америкиниң қирғизистанни қоллайдиғанлиқини тәкитлиди. Йованович ханим баянатида, " иқтисадий вә сиясий ислаһат қәдимини башлаш наһайити муһим әһмийәткә игә. Чүнки бу қирғизистанниң келәчикиниң капалити" дәп көрсәтти. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.