Ричард бавчер қирғизистан президенти билән ислаһат мәсилилирини музакирә қилди

• 
  2006-04-11

Америка ярдәмчи ташқий ишлар министири ричард бавчер сәйшәнбә күни бешкәктә қирғизистан президенти қурманбек бақийеф билән америка - қирғиз мунасивити вә қирғизистандики демократик ислаһат мәсилилирини музакирә қилди.

Әркин явропа радиосиниң хәвәр қилишичә, музакирә темиси қирғизистанда әркин базар игилики вә сиясий ислаһат елип бериш мәсилилиригә четилған. Бавчер, америка қирғизистанниң бу нишанға йетиши үчүн ярдәм беридиғанлиқини билдүрди. Бавчерниң әскәртишичә, қирғизистан рәһбәрлириниң ислаһатни илгири сүрүдиған вақти келип қалған. Бавчер билән президент қурманбек бақийеф оттурисидики сөһбәт, президент бақийеф мәмликәт ичи вә сиртида асасий қанун ислаһати елип бериш тоғрисидики вәдисини кечиктүрмәктә, дәп тәнқидкә учраватқан бир чағда өткүзүлди.

Ричард бавчер, қирғиз - америка мунасивәтлириниң иқтисади вә бихәтәрлик мәсилилири биләнла чәкләнмәйдиғанлиқини вә буниң демократик ислаһатни өз ичигә алидиғанлиқини билдүрди. У, қирғиз - америка мунасивитини махтиди вә " шундақла биз, қирғизистанниң күчини җәнубтики дөләтләргә өлгә қилишниң йеңи идийә вә мумкинчилики үстидә издиниватимиз " дәйду.

Әнҗан вәқәсидин кейин америка - өзбек мунасивити вә өзбекистан ички вәзийитиниң начарлишип кәткәнликини тәкитлигән бавчер," биз бир һөкүмәтниң өз хәлқиғә бундақ муамилә қилишини қоллиялмаймиз " деди. Бавчер, қурманбек бақийеф билән сөһбәт елип барған шу күни қирғизистандики аммивий тәшкилатларниң вәкиллирини қобул қилди. Бавчерниң қирғизистан сәпири униң афғанистан, пакистан, һиндистан вә қазақистанларда елип барған зияритиниң бир қисими.